Ta rơh lễ, Hiệp hội Doanh nghiệp Dak Lak hŏ rgum nkah tay ăp nău kan buăt nthoi, ntrŭt ntrôl ngăch tăch rgâl, ntop kơl rgâl mbrô, yur mham kơl nuĭh n’hanh ăp tŏng geh nău rêh, nkhôm rnê ăp mpôl, ăp nuĭh geh nău dơi ngăch prăk tâm nău kan rdâk njêng n’hanh hun hao n’gor Dak Lak. Wa Phạm Đông Thanh, Kruanh Hiệp hội Doanh nghiệp n’gor Dak Lak an gĭt, Hiệp hội ton ƀư tay ntung njŏ, ntop kơl droh rklaih jêr jŏt, ntrŭt ntrôl tâm nkrêp kan nsum n’hanh n’hao nău dơi tâm rlong an doanh nghiệp.

“Mpôl hên ntrŏng rnoh khlay bah Hiệp hội ta nău hội viên dơn geh moh ndơ, doanh nghiệp buăt nthoi đah nuĭh, moh jêr jŏt I dơi droh rklaih n’hanh moh trong dơh geh pơk luh. Gay hun hao ngăch, jŏ jong he ân n’hao dăng tâm nkrêp kan nsum, n’hao nău dơi mât bôk kan, rgâl mhe công nghệ n’hanh hun hao nkret njêng jru, rdâk njêng săk ntơ lư ndơ geh ƀư ta ntŭk.”

Tĭng trong nchrăp hun hao wăng sa êng bah dih ngih dak, tât năm 2030, Dak Lak nsrôih geh rlău 29.000 doanh nghiệp lăp kan, nkual wăng sa êng bah dih ngih dak rgop rlău du n’gul GRDP. Uănh ngai tât năm 2045, Dak Lak n’gluh tât rnoh geh rlău 53.000 doanh nghiệp, rgop nklăp 2/3 GRDP.

Gay tât rnoh hun hao wăng sa bar mbrô, Dak Lak ân ntik n’hao ăp tơm ndơ lam mpôl, tâm nê geh nău khlay bah nkual doanh nghiệp. Wa Y Nhuần Bya, Groi Kruanh UBND n’gor Dak Lak lah rjăp, n’gor mbra ndrel hăn kơl mpôl doanh nghiệp hun hao.

“N’gor ntrŏng mpôl doanh nghiệp lah băl tâm boh khlay tâm rnôk hun hao. Nău hun hao bah doanh nghiệp lah mâng weh nău dơi tam mât bôk kan n’hanh rgâl geh ntŭk ntuh kơl tăch rgâl. N’gor mbra ntrôl ngăch tay rgâl dơh glêh siƀŭt, n’hao âk nău mbơh kloh tâm nău an ƀư siƀŭt; rgum droh rklaih jêr jŏt, wăk kol mpeh ntuh kơl, neh ntu, dăp rgum, rdâk njêng n’hanh siƀŭt geh tât nău ƀư njêng tăch rgâl; n’hao âk rơh tâm dâl nău, djăt n’hanh nkra năn ngăch ăp nău dăn đă tâm di bah doanh nghiệp.”