Đah rơh trong kan “djăt n’hanh pah kan”, ta rơh rƀŭn nchră đah doanh nghiệp n’gor Dak Lak năm 2023 geh ƀư ta 19/10, nuĭh leo kan n’gor lĕ kơp dơn âk nău tâm rgop bâh ăp doanh nghiệp, tâm nĕ geh nău duh ma n’gor dôl joi trong doh rklaih.

Tĭng nău mbơh ta rơh rƀŭn nchră, tât aƀaơ dŭt âk doanh nghiệp ta Dak Lak lĕ leo kan, nsrôih ndâk nsơm nău jêr, ntrôl nău pah kan, tăch rgâl, mât đăp mpăn nău rêh an nuĭh pah kan. Yơn lah, nău pah kan hành chính hôm nha lah nău ma ăp doanh nghiệp ta n’gor mô ŭch ƀư. Lôch geh djăt nău tâm rgop bâh doanh nghiệp n’hanh ăp nkô̆ nău mbơh rblang bâh nuĭh leo kan ăp ntŭk kan, n’gâng kan, wa Phạm Ngọc Nghị, kruanh Ủy ban nhân dân n’gor Dak Lak lĕ rblang na nê̆ lơn du đê̆ nău kŏ văk, dăn đă bâh doanh nghiệp ta ăp trong kan na nê̆. Nkre ntĭm đă ăp ntŭk kan, n’gâng kan an geh nsrôih âk lơn tâm nău kơl kan an doanh nghiệp.