Tâm 5 năm ba năp, nău kan tâm rlong bâh ƀon lan kan lŏ mir pah kan jan sa blău, tăch rgâl blău, tâm rnglăp ndrel ƀư sâm geh têh ndrŏng n’hanh ach o nâp nâl ta Đăk Lăk lĕ geh âk rlău 1,19 rkeh rnăk ƀon lan tât râng pah kan, râng geh ăp năm bơi tât 239 rbăn rnăk ach o dơi geh nău pah kan jan sa, tăch rgâl blău. Ta rơh rƀŭn nchră, ăp đại biểu nkoch mbơh âk nău tă blău kan ngăn tâm trong hun hao wăng sa tuch tăm, ntoh lư ngăn lah nău pah kan jan sa, tăch rgâl blău, rgŏ jă nuĭh ƀon lan pă neh pơk trong hăn ta nkual ƀon lan, rgâl mhe nău pah kan tơm tăm, hun hao ta nkual way geh tăm âk sầu riêng geh tâm di đah nău mpŏng kan VietGap ndrel đah rdâk njêng rnoh mbrô nkual tăm kơl an nău kan tăch an dak bah dih. Aơ dơi geh uănh năl lah ăp nău kan dơi geh pơk hvi tâm ntrong kan let năp tay.