Nău mhe ntoh lư bah Nghị quyết lah rgâl âk bah trong uănh joi an rhŏ, nkre tâm pă gưl dơi mkra pă an, pă tay rnoh mrô nkual tăm, rnoh mrô ntŭk tâl dŭng an Kruanh UBND gưl xă. Tĭng nĕ, rmôt kan, êng nuĭh ƀư tĭng mbơh tơih n’hanh trok lĕ đah nău kan mpeh nău di na nê̆ bah nău mbơh; n’gâng kan bah dâng ƀư tĭng mât uănh, groi nđôi, sŏk lơi, an rlu mô lah nkra rnoh mrô tĭng nău ntrŭnh.

Đah ăp nkual way tăm sầu riêng ta Tây Nguyên, nău kơl mhe dơi mpŏng dôh rklaih âk jêr jŏt tâm rnôk dăn ƀư rnoh mrô rhŏ an tăch n’gluh. Mông nar mkra samƀŭt dơi rhoăt đêt. Đah ăp rmôt kan, êng nuĭh mô dăn ƀư tăch n’gluh, nar mkra n’hŭch bah 14 nar pah kan jŭr hôm 3 nar; nuĭh tăch n’gluh lăp ăp ntŭk tăch đă geh rnoh mrô, nar mkra n’hŭch hôm 10 nar.

Wa Vũ Đinh Cường, Groi Giám đốc N’gâng kan tuch tăm mât rong n’hanh Ntŭk ntô gŭ âm n’gor Lâm Đồng an lah, Nghị quyết mrô 36 bah Chính phủ tâm di đah nău ngăn, ngăn lah rnôk ntrŭnh mô đêt rnoh neh nkual tăm, nta an ăp rnoh neh tơm tăm tâm srah, tâm nĕ geh tơm tăm khlay rhŏ an tăch n’gluh. "Jêh rnôk Nghị định 36 bah Chính phủ dơi an, n’gor Lâm Đồng lĕ ntĭm rđău ăp ntŭk, ngih pah kan, ntŭk kan geh tât rgum mĭn njêng ăp nău ntrŭnh mhe gay mbơh ƀư. Nghị quyết dơi an dŭt tâm di, dơi mkra ăp nău wăk kol tâm năm bah năp, lơn lah đah nkual tăm mô geh an đêt đah rnoh neh n’hanh ăp rnoh neh tăm srah ăp ntil tơm tăm rhŏ an tăch n’gluh”.

Groi Kruanh N’gâng kan tuch tăm mât rong n’hanh ntŭk ntô gŭ âm Nguyễn Hoàng Hiệp lah rjăp, gay nău kơl tĭng Nghị quyết 36 bah Chsinh phủ ơm hăn lăp nău rêh, ăp ntŭk ndăn ndâk ƀư trong nchrăp mbơh ƀư, ntop kơl gưl xă tiăr nti, rgâl samƀŭt nkual tăm, ntŭk tâl dŭng, n’hao uănh nđôi n’hanh nkoch trêng.  Nău rgâl trong pă rnoh mrô mô knŭng kơl n’hŭch prăk dŏng, mông nar an nuĭh nkra njêng, ma hôm n’hao nău kloh rah wah, lĕ đah nău kan tâm trong pă manh ndơ lŏ mir.  “Đă ăp ntŭk rgum nkoch trêng gay tâm ban ŭch hăn ndrel. Nkô̆ nău mhe rơh aơ lah lĕ đah nău kan bah tĭng ngih pah kan, ntŭk kan; lĕ đah nău kan bah tĭng nuĭh, nuĭh ƀon lan râng dăn pă rnoh mrô nkual tăm dŭt kloh. Pă an rnoh mrô nkual tăm rơh aơ lah ƀư tĭng mbơh kloh rah wah n’hanh uănh lĕ đah nău kan bah năp pháp luật bah tĭng rnăk nkra njêng”.

Đah Tây Nguyên-nkual tăm sầu riêng têh bah lam dak, Nghị quyết mrô 36 bah Chính phủ dơi mpŏng rgâl mhe gay pơk hvi ndơ geh tâm di, n’hao dơi tâm rlong, ndâk njêng moh êng sầu riêng Việt Nam ta ntŭk tăch lam ntŭr neh, nkre pơk hvi dơi hun hao nâp nâl lơn an nuĭh ƀon lan n’hanh doanh nghiệp.