Nău lư bah Tâm nchră Ban Chấp hành đảng bộ n’gor Dak Lak, tâm 9 khay bah năm 2023, lĕ rngôch sŏk geh ngân sách ngih dak ta n’gor geh rlău 5.500 rmen prăk, hŭch 22% rđĭl đah ndrel khay dja năm e nơh.

Bol geh du rnoh prăk sŏk soăy dơi tât n’hanh rlău rnoh ŭch geh, yơn ta n’gor âk tơm sŏk geh hŭch âk rđĭl đah ndrel khay dja năm e nơh, lah: sŏk prăk dŏng neh, sŏk soăy bah nkual doanh nghiệp ngih dak, sŏk soăy mât njrăng ntŭk gŭ rêh, sŏk soăy nău geh wăng sa êng nuĭh… Ta năp nău ngăn geh dja, wa Bùi Văn Chuẩn – Cục trưởng Cục thuế n’gor Dak Lak, an gĭt tay nău dơn kan rgum tơm bah n’gâng kan sŏk soăy gay dơi tât rnoh geh sŏk bah năm 2023 lah ôp uănh tay ăp tŏng tơm geh sŏk, n’hao dăng ăp trong sŏk mplơ̆  tay rnon, an ƀư ăp rmôt trong nkra nking nchăng dŏng hóa đơn mô geh nău way nkre an ƀư ăp trong ntop kơl kơt njong rnon, n’hŭch đêt gay doanh nghiệp dâk hao tay  klaih rlău jêr jŏt.”