Dak Nông n’hŭch rnoh rnăk ach o ngăch ngăn nkual Tây Nguyên. Aơ lah nău mbơh dŭt âk uănh tât ta Đại hội Đại biểu ăp rnoi mpôl đêt n’gor Dak Nông rơh tal 14, năm 2024 ntơm ƀư ôi nđaơ (15/10) đah tât râng bah 250 đại biểu ntoh măt an rlău 227.000 nuĭh rnoi mpôl đêt lam n’gor. Lvang 2019-2024, ndrel đah ăp bôk nău kan, nău kơl bah Trung ương, n’gor Dak Nông lĕ tâm rgop ăp tơm prăk, mbơh ƀư âk bôk nău kan, nău nchrăp ntuh kơl ntung trong ngih wâl, rgop âk trong joi nău rêh, hun hao ntrong ƀư n’hŭch ach o, mkra nău mô tŏng neh gŭ, jay gŭ, neh tuch tăm.

Tă bah nĕ, rnoh rnăk ach o nkual rnoi mpôl đêt n’gor Dak Nông hŭch bah 30,14% năm 2019 jŭr hôm 13,24% tâm dŭt năm 2023. Tĭng wa Ngô Thanh Danh, Bí thư N’gor ủy Dak Nông, trong kan rnoi mpôl đêt n’hanh ƀư tĭng ăp nău kơl rnoi mpôl đêt ta ntŭk lĕ geh âk săk rnglăy dôl rhơn. Năm kan tât, n’gor Dak Nông nsrôih n’hŭch rnoh rnăk ach o jŭr bah dâng 10%; 70% rnoh xă nkual rnoi mpôl đêt n’hanh nkual yôk tâm di thôn ƀon mhe.