Tâm du rân lha cờ rklaih luh mpăr kalơ chor Dinh Độc Lập nŭng nar 30 khay 4 năm 1975 hŏ lăp tâm lịch sử rnoi nuĭh kơt du nar têh khlay – nar miền Nam rklaih luh lam lĕ rngôch, neh dak dơn ngoăy, yôk nor rgum du bôk. Nê mô dơn lah lơh dơi têh bah ƀon lan Việt Nam tâm rơh mprơh Mỹ kơl neh dak dăp rduăl krit jêr, ma hôm lah ndơ ntĭt chrat ang bah trong dăng cách mạng, bah nău mĭn đăp mpăn, nsan êng n’hanh suan dăng tâm rnglăp lam rnoi nuĭh.

Lơh dơi 30/04/1975 lah nău dơi bah nău nsrôih lŭ ntang bah rnoi Việt Nam mpeh du neh dak dơn ngoăy, mô geh koh tăch bah ăp bu êh rkeh. Kruanh Hồ Chí Minh – nuĭh kruanh dŭt têh blău bah rnoi nuĭh hŏ lah rjăp trong tĭng di mô dơi nkhĭt roh: “Dak Việt Nam lah ngoăy, rnoi nuĭh Việt Nam lah ngoăy. Dak me mbra dơi suăt, yôk mbra dơi lưn, yơn trong uĕh di nê mô dơi rgâl.” Lơh dơi 30/4 lah ndơ an saơ rêh ngăn an trong uĕh di bah rơh “Mô geh ndơ khlay rlău nău dah rŏng đăp mpăn”.

Lơh dơi têh khay năm mhe 1975 hŏ an saơ tay nău têl nkah dăng ta ntŭk gŭ kan lam ntŭr neh, ntroh n’gôr jru trong  leo rklaih luh rnoi nuĭh ta âk nkual Á, Phi, Mỹ Latin; ntrŭt nsôr ăp rnoi nuĭh dâk tay rlơn lơh mpôl tŭn jot mhe n’hanh nsĭt tay nău dơi dah rŏng, đăp mpăn. Nê lah lơh dơi bah nău tâm di bah năp dak têh kuâng ntêt mpet, nău lah rjăp bah năp ăp mpôl lam ntŭr neh an lah: du rnoi nuĭh bol jê̆ lê̆ yơn lah geh nău di, nău tâm rnglăp n’hanh nău mĭn rôih sŏng, đah nău n’grŏ tĭng, nău kơl kloh rsang bah băl mpôl dak bah dih, bah ăp mpôl rgâl mhe n’hanh bah ƀon lan ŭch rŏng nău đăp mpăn lam ntŭr neh ri mbra geh nău dơi ăp phŭng rlăng dăng rlău âk tơ̆.

Nău mbơh "Dak Việt Nam lah ngoăy, rnoi nuĭh Việt Nam lah ngoăy" bah Kruanh Hồ Chí Minh mô dơn lah du trong di, du trong rƀŏng têh jong, ma hôm lah nău ntrŭnh bah nuih n’hâm bah lam rnoi nuĭh.

Tâm n’huk ngo ŭnh ndrak tâm lơh tâm su, nău lah nê jêng tơm suan dăng têh kuâng, rêng nău nđơr dăng, njêng suan ntrôl an rkeh nuĭh Việt Nam chuat luh tât ntŭk tâm  lơh tâm su đah nău mĭn rôih dăng "N’groh săk an neh dak dâk rêh”. Nău bah Wa lah nău rgum đă huêng khlay, lah nău ntĭt bah nuih  n’hâm nsrôih rlău ăp rngot ji, krit jêr, gay nsĭt tay an dơi nău đăp mpăn, dah rŏng an rnoi nuĭh, dơn ngoăy neh dak n’hanh rhơn nđơr hơm răm an ƀon lan.

Di n’gul rôk năm hŏ hăn rlău kơp ntơm bah neh dak ntêng lêng du dor, yơn ăp nău rêng lam bah nău mprơ rnê nău dơi lơh plơ̆ sĭt nha hôm n’gloh mbro tâm nuih  n’hâm rnoi nuĭh Việt Nam đŏng. Ăp rơh kơn Việt Nam nar aơ n’hanh ôi tay klak nkah mbro n’hâm suan n’hanh n’groh an têh kuâng an đăp mpăn bah neh dak, yor an rhơn nđơr hơm răm bah ƀon lan n’hanh an nău mât kơn mbro, hun hao bah rnoi nuĭh.

He mpơl nuih n’hâm nkah gĭt jru đah băl mpôl dak bah dih ăp mpôl rgâl mhe, ăp dak xã hội chủ nghĩa oh nô, ăp mpôl kan kơl nuĭh n’hanh ƀon lan rŏng đăp mpăn lam ntŭr neh- hŏ ndrel hăn, kơl n’hanh n’grŏ tĭng Việt Nam tâm du bông năm khay tâm lơh tâm su rklaih luh rnoi nuĭh, tâm ban kơt tâm n’gâng kan plơ̆ njêng tay n’hanh hun hao neh dak lôch bah tâm lơh tâm su.

Lôch rlău 50 năm neh dak dơn ngoăy, he hŏ tŏng geh nău han săk, tŏng geh nău nsing nơm, nău n’hao êng săk n’hanh tŏng nuih n’hâm mô tưp răp gay rlău nău rngot ji gay ndrel rƀŏng uănh let lăp – gay rơh tâm lơh hŏ rlău mô hôm lah ntu brŏng nking ƀah đah ăp nuĭh kon ndrel du dak mham Lạc Hồng.

Ta njăr trong hun hao nê, trong kơl tâm lăp nsum rnoi nuĭh way dơi Đảng n’hanh Ngih dak ntrŏng lah trong sơch jŏ jong, lah n’gâng tơm tâm mpôl tâm rnglăp lam rnoi nuĭh. He gĭt kloh ăp nkô̆ nău jêng tât tâm lơh tâm su- ntơm bah nău lăp rglah, tâm nkhah bah dih an tât ăp nău mplư rlăm lơh chrai nău tâm rnglăp, brach sui nău tâm rkeh yor gay ma ƀư chính trị. Yơn he wât lah: ăp nuĭh Việt Nam, bol ma tâm dak mô lah bah dih dak, bol tă bah mpeh tĭng, ndel luh bah du ndru tơm da dê, du nău tâm rŏng an ƀon tơm, an neh dak.

Tâm lăp nsum rnoi nuĭh mô di lah chuêl nău kăl e mô lah njâm lĕ nău mha êng, ma lah dơn ŭch ăp njônh uănh êng êng tâm nuih n’hâm mô hôm tâm tưp răp n’hanh tâm uănh khlay nsum, gay ndrel rƀŏng tât nău dơi têh lơn: rdâk njêng du dak Việt Nam bah tâm lơh tâm su, dơn ngoăy neh dak, han dăng, rsang rnglăy, têh ndrŏng uĕh, gay ăp rơh kơn bah  kơi tay mô hôm saơ geh tâm lơh tâm su, tâm n’hơt lêng ngai n’hanh nuih n’hâm tâm rkeh, roh yot kơt u che he hŏ tă ât rdâng đŏng.

He mô dơi nchih tay nău kăl e, yơn he mbra tor luh tay trong hăn let năp tay. Nău kăl e lah gay ma nkah, gay ma gĭt n’hanh rhuăt luh nău tă ơm gĭt nti. Nău rêh let năp tay lah gay ndrel rdâk njêng nta trong dơh n’hanh hun hao.

Rlău ăp nuĭh, rơh kơn aƀaơ gĭt kloh lah đăp mpăn n’hanh dơn ngoăy mô di lah ntŭk tât n’glĕ dŭt, ma lah bôk ntơm an du njăr trong hăn mhe: njăr trong rdâk njêng du neh dak Việt Nam bah tâm lơh tâm su, têh ndrŏng, gĭt blău, hun hao n’hanh rêh mbro. Lah kơt rơh u che he hŏ nchih nkah trong sŏng di "Dak Việt Nam lah ngoăy, rnoi nuĭh Việt Nam lah ngoăy" ma ăp roh yot, ri rơh kơn aƀaơ ân ƀư trong sŏng di nê jêng trong dâk kan suan ntrôl hun hao, chăt jêng nar mpăr lot ngai tâm rơh mhe.

Rlău ăp rnôk, he ân rdâk njêng du jâng wăng sa nsrôih ndôr êng, nsan hao êng; du jâng nsing njrăng n’gang neh dak- rnă njrăng lam ƀon lan, lam lĕ rngôch n’hanh têh dăng mhe; du trong kan chính trị glêh tam, yach ngăch, geh nău dơi ngăn, du nău rêh hun hao, tâm rnglăp, văn hóa n’hanh geh nău rŏng nuĭh.

Rơh hun hao mhe he dôl chuat tât- đah công nghệ trí tuệ nhân tạo, rgâl mbrô, wăng sa kloh uĕh n’hanh hun hao nâp dăng – ân geh nău mĭn rgâl mhe, trong ntĭt leo hun hao mhe , kon nuĭh mhe. Ta năp măt, he hôm âk ntul rlong  mpeh trong đă tĭng, rnoh yach ngăch kan, săk blău tơm nuĭh kan, rnă njrăng ntŭk gŭ rêh, nuh srê, rgâl n’hâm sial n’hanh lĕ ma geh ma nău rnă njrăng mô way geh. Yơn nău kăl e hŏ an he saơ: rnoi nuĭh Việt Nam mô hŏ tă plơ̆ rŭch bah năp krit jêr, ntul rlong. Nkô̆ nău lah he mbra tŏng nuih n’hâm rât nănh gay rgâl, tŏng nău mĭn rôih sŏng gay nsan hao, n’hanh tŏng nău tâm rnglăp gay ƀư jêr jŏt jêng suan ntrôl hun hao lah mô.

Uănh mpeh bah năp, he mbra geh nău dơi n’hao êng săk nsing nơm tâm suan dăng bah rnoi Việt Nam – du rnoi nuĭh hŏ mô gĭt dah âk lơh dơi phŭng rlăng lăp pit in n’hanh dâk lơh tă bah tâm lơh tâm su, năl dơi săk nơm bah năp nău hŏ tă geh kăl e n’hanh bah năp lam ntŭr neh. Đah nău way ơm rbăn năm rdâk njêng neh dak n’hanh mât njrăng neh dak, đah nău nđơr nsan hao mô gŭ rlu, đah rơh kơn druh ndăm gĭt blău, wơl geh, rŏng dak, blău mhe n’hanh han săk – Việt Nam mbra geh nău dơi ngăn.

Rôk năm XXI lah rôk năm bah  ăp rnoi nuĭh gĭt mât êng săk nơm. N’hanh rnoi nuĭh Việt Nam – đah lĕ rngôch ăp nău tă ơm gĭt kơt nti bah năl e, đah lĕ ma nău tâm rnglăp aƀaơ – mbra nđơn nchih tay ăp plơp mhe lơp chrêk tâm njăr trong hun hao bah he. Yor du neh dak Việt Nam đăp mpăn, dah rŏng, rhơn răm, hao geh, srăch uĕh, ndrŏng kuâng, geh ntŭk gŭ kan têh khlay n’hanh geh nău tam ngơi khlay tâm lam ntŭr neh.