Gay geh ăp nău dơi khlay, tâm du njăr trong cách mạng 96 năm, Đảng Cộng sản Việt Nam hŏ treh têl âk jêng ntơm nău rgâl mhe. Rgâl mhe tâm nău sơch gung trong ntơm bah rnôk njêng tâm ban kơt rnôk tĭng ƀư nău rđău đă neh dak rlău ăp jêr jŏt, ndơ̆ n’gâng kan cách mạng bah rnoi nuĭh he hăn ntơm bah nău dơi dja tât nău dơi êng ƀa ƀă. Du njăr trong 96 năm, Đảng way mô rlu ƀư mhe êng nơm gay di đah nău khlay mât bôk kan têh kuâng, n’glêh an ăp nău dơi bah Cách mạng Việt Nam.

Kơp ntơm bah rnôk njêng tât aƀaơ, rlău 14 rơh đại hội, Đảng way grêt dăch tĭng nău ŭch geh bah cách mạng gay n’gluh âk trong nchrăp, Nghị quyết têh yor an neh dak, an ƀon lan. Groi giáo sư – Tiến sĩ Nguyễn Viết Thông, Tổng Thư ký ơm Hội đồng Lý luận Trung ương an lah, tâm Cương lĩnh lor bôk năp bah Đảng năm 1930, Nguyễn Ái Quốc hŏ ndăn dŏng blău mhe lý luận bah Chủ nghĩa Mác Lênin tâm nău ngăn ngăn Việt Nam rnôk uănh khlay tât nuih n’hâm dja:

“Ta Tâm nchră njêng Đảng hŏ n’gluh an dŏng ăp siƀŭt nchrăp lor Chánh cương rtŭt glêh; Gung trong rtŭt glêh; Điều lệ rtŭt glêh; Bôk nău kan rtŭt glêh bah Đảng, ăp siƀŭt nchrăp lor bôk năp n’glăp jêng cương lĩnh lor bôk năp, hŏ nchŏng kloh, nău ŭch rloh rlău bah Đảng lah yor an nău geh bah ƀon lan, n’hanh ntơm bah nê tât aƀaơ he way nsrôih an rnoh tât kan têh khlay nê”.

40 năm rlău n’hanh âk nuĭh nha hôm kơt ơm nău nkah bah du njăr trong jong ma bu way kuăl lah “rơh bao cấp”... Nê lah du rơh lịch sử mha êng bah neh dak đah ăp nău nkoch jêr chuêl. N’hanh ntơm bah aơ, nău rêh rgâl mhe hŏ rlău âk njuat đăt ndal geh năp rêh. Tâm nê, hŏ lôch jêh trong kơl wăng sa mhe, rgâl jâng wăng sa mât dŏng tĭng trong tâm n’gluăk tăch rgâl geh nău tâm pơk an bah Ngih dak. Giáo sư - Tiến sĩ Tạ Ngọc Tấn, Groi Kruanh Rnâng kan Hội đồng lý luận Trung ương an lah:

“Nê lah du njuat hăn dŭt khlay jêng tât du rut ăp nkô̆ nău ndơ̆ luh: lah rjăp Ngih dak pháp quyền, năl di nău dŭt khlay bah nău rdâk njêng rmăn glêh tam Đảng, năl di dŭt têh mpeh văn hóa, hun hao wăng sa nkre đah rdâk njêng, hun hao văn hóa, tĭng ƀư rgâl uĕh blău geh geh tâm ban tâm nău rêh… Ăp lý luận dŭt khlay kơt nê̆ hŏ dơi n’glôch jêh, uănh năl lôch rlău 20 năm rgâl mhe bah Đảng”.

Cương lĩnh rdâk njêng neh dak tâm rơh hăn rlău hao chủ nghĩa xã hội (kơi ntop, hun hao năm 2011) dơi n’gluh an dŏng ta Đại hội XI bah Đảng ntrŏng rnoh tât n’gul thế kỷ 21: “lam Đảng, lam ƀon lan  he ân mbrôn suan nsrôih rdâk njêng dak he jêng du dak công nghiệp têh dăng mhe, tĭng trong rƀŏng xã hội chủ nghĩa”. Pham nkô̆ têh nchih tâm Cương lĩnh 2011 bah Đảng mpơl nău gĭt êng nkrum lam mpeh “rêh jêng kon nuĭh, xã hội chủ nghĩa ma ƀon lan he rdâk njêng” nha hôm dơi mât kơt ơm an tât aƀaơ. Groi giáo sư Tiến sĩ Nguyễn Trọng Phúc, Học viện Chính trị Quốc gia Hồ Chí Minh lah rjăp:

“Lôch gŭ mĭn lý luận n’glôch jêh ngăn ngăn n’hanh hun hao lý luận, lơn lah lý luận mpeh chủ nghĩa xã hội n’hanh gung trong hao tât chủ nghĩa xã hội Việt Nam tâm rnôk rgâl mhe ri nkre tĭng kơn ƀư jêng ngăn ngăn ăp nău mĭn lý luận, lơn lah 10 nău tâm boh têh ma Đại hội 13 hŏ n’glôch jêh, nê lah nău dơi mpeh rdâk njêng, rmăn glêh tam Đảng mpeh lý luận, nău mĭn”.

Tâm nô nău lam ntŭr neh ƀư rơh Cách mạng công nghiệp tâl puăn đah rnoh têh hvi, rnoh ngăch n’hanh mô hŏ tă geh, đah ăp đăt ndal mpeh công nghệ, ring tam dăng tât lĕ rngôch ăp dak ri rgâl blău ƀư mhe lah nău mĭn mhe tâm trong tor hun hao bah lĕ rngôch ăp dak.

Nău dơi bah Đại hội Đại biểu lam dak tâl XIV, lah jâng ntơm khlay nđơn tay 40 năm rgâl mhe, ntơm du rơh rgâl mhe tay, lăp rgum, lah jâng ntơm khlay tâm nău hun hao bah neh dak; tâm nê, sŏk rgâl mhe ƀư suan ntrôl dăng, sŏk kon nuĭh n’hanh văn hóa ƀư jêng nsing, sŏk đăp mpăn ƀư tơm êng nkre đah lăp rgum jru hvi ƀư trong rƀŏng dâk kan. Aơ lah rnôk Việt Nam an mpơl saơ nău nđơr nsan hao, ntơm pơk săk geh nău gĭt blău, n’hao nău dơi tâm rlong n’hanh rƀŏng tât hun hao ngăch, nâp dăng. Đại hội XIV mô dơn lah nău nsrôih chính trị, ma lah nuih n’hâm rơh mhe, nuih n’hâm ndơ̆ Việt Nam chuat lăp dăng tâm rơh hun hao mhe kơt nău lah rjăp bah Tổng Bí thư Tô Lâm:

“Đại hội đại biểu lam dak tâl XIV lah du nar kan chính trị khlay bah Đảng n’hanh rnoi nuĭh he, lah du jâng ntơm lịch sử bah neh dak tâm rơh Hồ Chí Minh, ntơm nău wăch rgum nău way ơm rbăn năm Văn hiến bah Rnoi nuĭh gay hun hao lhung jong tâm rơh mhe”.

Rlău 96 năm têh jêng n’hanh hun hao, ntơm bah Cương lĩnh lor bôk năp tât ăp nău dơi têh kuâng bah 40 năm Rgâl mhe n’hanh jâng ntơm Đại hội XIV, Đảng he way du trong sŏng yor an neh dak, yor an ƀon lan, mô rlu rgâl êng săk nơm, rtŭt rmăn glêh tam gay rđău đă neh dak hao têh jêng. Đah nău nđơr lhung jong săk tâm rơh mhe, sŏk nău rgâl blău mhe ƀư suan ntrôl, sŏk kon nuĭh n’hanh văn hóa ƀư jâng nsing, Việt Nam nâp jâng chuat lăp tâm njăr trong hun hao ngăch, nâp dăng.