Mbah rhơn nău dơi Đại hội tâl XIV bah Đảng n’hanh nkah ndray 96 năm Nar njêng Đảng Cộng sản Việt Nam (3/2/1930-3/2/2026), ôi 2/2, ta Hà Nội, Tổng Bí thư Tô Lâm, Kruanh dak Lương Cường hŏ râng Lễ sa nkra lôch jêh ƀư têh uĕh tay, mon mhe nhih pah kan Kruanh dak.

 Lah ta rnôk lễ sa nkra, Kruanh dak Lương Cường lah rjăp, aơ lah nar kan geh nkô̆ khlay mha êng, mô dơn ntơm lôch jêh n’glăp dŏng du ntŭk kan khlay, ma hôm mpơl nău krêp dêh lhăt đah nău way ơm lịch sử bah cách mạng Việt Nam, đah nău ŭch rdâk njêng Ngih dak pháp quyền xã hội chủ nghĩa Việt Nam têh uĕh mhe, nâp dăng, Ngih dak bah ƀon lan, tă bah ƀon lan, yor an ƀon lan, tâm rơh hun hao mhe bah rnoi nuĭh Việt Nam. Gay jay dơi mât dŏng geh nău tam, Kruanh dak đă Văn phòng Kruanh dak lah nuĭh tơm dơn, mât dŏng ƀư tơm kan nsum đah Văn phòng Trung ương Đảng, Nkual ƀon têh Hà Nội, nuĭh tơm ƀư ndranh dơn, mât, dŏng geh nău tam, đăp mpăn, jŏ jong nhih pah kan. Ta rơh lễ, Tổng Bí thư Tô Lâm n’hanh Kruanh dak Lương Cường, ndrel ăp kruanh rđău kan, kruanh rđău kan ơm Đảng, Ngih dak hŏ ƀư koh bok sa nkra Nhih pah kan Kruanh dak.