Hôm bar pe nar đŏng lah tât Tết Trung thu – tết bah kon se lam dak. Aơ lah ăp rnôk nuĭh ƀư, tăch rgâl ndơ pâl rlưn, bánh kẹo n’gluh tăch dŭt âk ntil ndơ, gay tŏng an nău ŭch geh rvăt năp bah năch, rhŏ dŏng an kon se. N’gâng kan dơi kan an ƀư ăp trong nkra gay mât đăp mpăn an Tết Trung thu.

Hăn wăr ăp trong nkual ƀon têh Buôn Ma Thuột, n’gor Dak Lak kơt: Phan Chu Trinh, Lê Thánh Tông, Y Jut… ăp ndrơng ndơ tăch bánh trung thu bah ăp săk ntơ bánh ntoh lư dơi pla tăch ntơr uĕh măt uănh. Tĭng yuh Bạch Thị Bích Phượng, nuĭh tơm tăch ta trong Lê Thánh Tông, năm aơ yuh tăch ơm ntơm bah n’gul khay bah năp nơh yơn rnoh nuĭh rvăt mô âk.

“Năm aơ năch rvăt ơm, mô rvăt âk ndal. Rnoh khlay năm aơ hao lơn, du đêt ntil bánh kơt bánh têh khlay ri jŭr thuk lơn, hôm bánh tăch chrai ri bar pe rbăn du mblâm.”

Hôm yuh Bạch Thị Sách, nuĭh hŏ rlău 10 năm tăch bánh trung thu ta Buôn Ma Thuột, gay der bah rmeh ndơ tăch âk ir, yuh mbra nkre tăch, nkre uănh rnoh âk bu rvăt gay n’hao rnoh âk bánh sĭt tăch an tâm di.

“Rnoh âk rvăt ri mô hŏ âk ngăn, nchah nchrai dơm đŏng. Ntŭk tât lĕ tăch ri he n’hao tât dah nê dơm, he mô  nănh n’hao âk yor ăp năm rnoh âk tăch êng êng. He tăch geh âk ri he n’hao âk, tăch đêt ri he n’hao đêt lah mô ri păng rmeh bưm.”

Bánh trung thu năm aơ dơi pla tăch âk ntil mpeh săk ntô n’hanh ntil. Bah meng bar ntil bánh tơm lah bánh gŭch n’hanh bánh mƀêh đah nău ƀô kah way ơm ri geh tay âk nău ƀô kah mhe kơt: ƀô reng bát bửu, bào ngư, jambon xá xíu, djăr gŭch… Rlău ma nê, hôm geh bánh an ăp kon se jê̆ n’hanh nuĭh sa sât, sa der. Bah meng nău sơch rvăt bánh trung thu ta ntŭk tăch na nê̆ ri  aƀaơ nuĭh dŏng geh tay trong sơch rvăt ndơ ta ăp ntŭk ndranh tăch rgâl điện tử mô lah ăp trang mạng xã hội. Yuh Trần Thị Ngân, ta phường Tân An, nkual ƀon têh Buôn Ma Thuột an gĭt:

“Ta ntŭk tăch geh dŭt âk ntil bánh, yơn gâp sơch rvăt lah đăp mpăn kloh uĕh ndơ sa, săk ntô rup uĕh măt uănh, bánh geh săk ntơ lư.”

Gay đăp mpăn nău dơi geh n’hanh ngăch dăng n’hâm suan  nuĭh dŏng sa, mpôl kan dơi kan dôl n’hao dăng hăn ôp ŭanh, mât kân ntŭk tăch bánh trung thu gay nking nchăng nău ƀư njêng, tăch rgâl ndơ rlăm, ndơ mô gĭt kloh tu tơm luh, mô đăp mpăn săk kah, mô đăp mpăn kloh uĕh ndơ sa. Wa Giao Thanh Tùng, Groi Cục trưởng Cục mât ŭanh ntŭk tăch rgâl Dak Lak an gĭt:

“Cục Mât uănh ntŭk tăch rgâl n’hao ăp rmôt mât ŭanh ntŭk tăch rgâl bôk năp lah mât uănh ntŭk tăch, rƀah gĭt ăp ntŭk ƀư njêng tăch rgâl bah nê rgum nău lư ôp ŭanh mpeh tơm luh, ndơ tăch bánh trung thu, ntŭk ƀư njêng tâm ban kơt ndơ pâl an kon se. n’hanh nkoch trêng, mpư n’hao ăp ntŭk ƀư njêng, mô lah ăp ntŭk đại lý tăch bánh trung thu ƀư jăp, tĭng di quy định pháp luật, hôm ăp ntŭk ƀư mô di ri rmal lhăt tĭng nău way quy định bah pháp luật, du gâl ri mbơh kloh nkoch trêng an lam mpôl gĭt gay ntĭm nti nsum.”

Cục trưởng Cục kon se (Bộ Lao động - Thương binh n’hanh Xã hội) Đặng Hoa Nam mhe geh siƀŭt njuăl đă Sở Lao động Thương binh n’hanh Xã hội ăp n’gor, nkual ƀon têh ƀư tơm, kan nsum đah ăp nhih pah kan dơi kan n’hanh ăp mpôl kan geh tât gay mât đăp mpăn an kon se tâm rnôk Tết Trung thu năm 2023. Tâm nê, ân đăp mpăn njrăng, n’gang rtoh, ŭnh sa an kon se rnôk dŏng ăp ndơ pâl Trung thu đâng ăp ndơ geh ma nău rtoh ŭnh sa âk (đèn ông sao, đèn lồng geh su jrêng, si pŭk dŏng n’hâm phôl dơh geh ƀoh ŭnh sa...), lơi ir su ŭnh mbŭch, pháo kao tâm ăp nău kan phá cỗ trông trăng ta rnăk wâl n’hanh ăp nkual gŭ pâl nsum. Đăp  mpăn njrăng, n’gang ăp ndơ geh ma nău lơh jêng khĭt rmanh, geh ma nău khêh rlŭn đah ăp ntil ndơ pâl. Đăp mpăn kloh uĕh ndơ sa, njrăng n’gang  khêh an kon se đah ăp ntil bánh, kẹo, play do, ndơ ngêt n’hanh ăp ntil ndơ sa puăch ka. Đăp mpăn đah ăp ndeh rklư rsong hăn n’hanh ăp gung trong geh rnoh âk kon se n’hanh nuĭh ƀon lan rsong hăn tâm rnôk Tết Trung thu.

Geh tât nău dơn kan ƀư Tết Trung thu an kon se, Thứ trưởng Bộ Lao động - Thương binh n’hanh Xã hội Nguyễn Thị Hà hŏ ký siƀŭt đă UBND ăp n’gor, nkual ƀon têh mpeh Trung ương rđău đă ăp n’gâng kan n’hanh UBND ăp gưl tâm pă prăk bah ngân sách ngih dak; rgum ăp tơm ndơ bah mpôl kan, ăp nuĭh gay chop khâl, pă nklâm ndơ Trung thu an kon se. Tâm nê, uănh khlay tât kon se geh nău rêh jêr jŏt, kon se mpeh rnăk ach o, rnăk dăch kêng ach o, kon se nkual rnoi mpôl đê̆, nkual jru, nkual ngai, nkual n’har bri, gôl dak, kon se kon đơi n’hanh kon se geh tât khuch bah trôk nar lơh, nuh srê  kop ji./.