Tĭng ƀư trong nchrăp bah Đảng, trong kơl pháp luật bah Ngih dak mpeh nkô̆ nău ƀon lan rnoi mpôl đê̆, đăp mpăn nău dơi kon nuĭh an ƀon lan rnoi mpôl đê̆; ta ăp nkual mpeh yôk yang; bah âk năm aơ, pah kan đăm gĭt, ntĭm  nti pháp luật hŏ dơi an ƀư đah âk ntil nkô̆, ngăn ngăn, gay n’hao nău gĭt êng pháp luật an ƀon lan rnoi mpôl đê̆, nkre ntrŭt ntrôl hun hao wăng sa- rêh jêng kon nuĭh ta ntŭk nar lơn ma hun hao.  

Bơi 3 năm aơ, Hội Liên hiệp bu ur n’gor Hòa Bình hŏ an ƀư âk nău kan ntrŭt ntrôl tâm ban bu ur bu klô, ăp gưl hội bu ur hŏ rgum nkoch trêng gay n’hao nău gĭt êng an oh yuh bu ur ƀon lan rnoi mpôl đê̆ rgâl nău mĭn, nău kan tâm ăp nău kơt nti, tuch tăm, gŭ rêh. Yor kơt nê̆, âk oh yuh bu ur hŏ njêng dơi nău rêh mhe, nsan hao klaih rlău ach o jŏ jong. Rnăk yuh Bùi Thị Vịnh, rnoi Mường, ta xã Định Cư, nkuâl Lạc Sơn, n’gor Hòa Bình ntơm nơh mpeh rnăk ach o,  pah pât wăr năm. Ntơm bah rnôk dơi Mpôl bu ur nkoch trêng mpeh trong kơl bah Ngih dak mpeh nău ntop kơl tơm prăk manh n’hanh nău tă ơm gĭt kan tuch tăm mât rong; yuh Vịnh hŏ tât dơi đah nău gĭt blău mât rong, wăng sa mir bri; rnăk yuh hŏ geh âk tơm wăng sa đăp mpăn. Yuh Vịnh nkoch:

Djăt ma du khay ri mpôl hên hăn giao ban du tơ̆ ta xã. Ri kơt yuh dja tĭng sai ngai, yuh ri nha hôm gŭ ta ƀon. Ăp nuĭh gŭ tâm ƀah ngai nsum yơn ăp yuh nha hôm tâm dêh bên nsum đŏng, tâm pă nsum đŏng. Aƀaơ hŏ geh tâm ban hôm, he gŭ ta thôn ƀon nkoch trêng âk đŏng, ăp yuh hăn nti rƀah gĭt nău nkoch trêng bah bu ur tâm ƀon hôm. Aƀaơ mô tâm rmot bu ur bu klô đŏng ôh. Aƀaơ hun hao geh âk tơm  prăk an oh yuh bu ur hôm đŏng. Tơm prăk manh kơl thuk mô lah tuch tăm ma ƀư hồ sơ ri khân păng nkra ƀư ngăch đŏng. He geh tơm prăk manh wăng sa đŏng.

Wa Bùi Thị Ngơi, Kruanh Hội liên hiệp bu ur nkuâl Lạc Sơn an gĭt: nău tĭng ƀư tâm ban bu ur bu klô an ƀon lan rnoi mpôl đê̆ dôl dơi ăp gưl hội bu ur ntơm bah n’gor jŭr tât tâm dâng an ƀư dăng; ăp gưl ủy đảng, n’gâng kan ta ntŭk dôl dŭt uănh khlay đŏng; gay hăn ndrel đah kônh wa tâm hun hao wăng sa:

Grêt dăch trong nchrăp, nău dơn kan n’hanh nău dơn kan pah kan bah hội, ri  mpôl hên hŏ ƀư âk nău kan. Lơn lah hŏ uănh khlay tât nkô̆ nău n’hao nău dơi kan an oh yuh bu ur. Lơn  lah ntop kơl bu ur ntơm njêng nău kan, n’hao nău dơi wăng sa  an bu ur. Aơ lah ngoăy tâm ăp rnoh tât kan ntoh lư ma mpôl hên aƀaơ dôl ƀư n’hanh tĭng ƀư. Mpôl hên dôl tĭng ƀư rnoh tât kan bah bôk nău kan ƀon lan rnoi mpôl đê̆ n’hanh ntop kơl an ăp rmôt tâm boh, hợp tác xã n’hanh ăp rnăk hun hao wăng sa.

Tâm trong kan ntĭm nti, n’gor Hòa Bình hŏ rŏng an tơm prăk tâm di gay ntop kơl, nta trong dơh an nai ntĭm, kon se nti nkual jru, nkual ngai, nkual jêr jŏt. Nơm geh kơt nê, săk blău ntĭm nti ta ăp nkual jêr jŏt dơi n’hao du kơn prêh mhe. Êng ta nkuâl Cao Phong, aƀaơ lĕ rngôch ăp kon se ƀon lan rnoi mpôl đê̆ nti gưl 2, gưl 3 ta ăp xã nkual prêh hŏ dơi kơt nti rgum ta nhih nti nội trú. Oh Triệu Hương Giang, ta xã Yên Lập, hŏ 6 năm aơ dơi kơt nti ta Nhih nti Phổ thông dân tộc nội trú Cao Phong nkoch:

Ăp trong kơl ma mpôl hên dơn geh lah dŭt ăp tŏng ngăn. Mpôl hên geh ntŭk gŭ kơt nti ăp tŏng têh hvi. Mpeh ndơ dŏng nti ri mpôl hên dơn geh ăp tŏng ndơ dŏng nti, siƀŭt sitra dơi nhih nti phăt kơl. Mpôl hên djăt ma gơih tiăr nti ren dơm. Nai ntĭm nti tâm nhih nti ri tâm ban ma bôk me, bôk bơ̆, me mât chăm tĭng mbâr sa rngăl bĭch an mpôl hên.

Tĭng Sở Giáo dục n’hanh Đào tạo bah n’gor Hòa Bình, kon se ta năm hăn nti ta nkuâl geh tât rlău 99%. Nkual dăch lơn kơt nkual ƀon têh, thị trấn hŏ geh tât 100%. N’gâng kan ntĭm nti n’gor Hòa Bình dôl rgum n’hao săk blău ntĭm  nti an rmôt nai ntĭm nti ăp gưl; rgâl mhe trong ntĭm nti tâm di đah tĭng nău geh na nê̆ gay n’hao săk blău ntĭm nti an kon se nti ƀon lan rnoi mpôl đê̆.

Ăp rơh tât đah ăp trong kơl, pháp luật; nơm geh rgâl uĕh mpeh nău  mĭn, nău kan; nău rgâl mpeh ăp ntil tâm nău rêh, kơt nti, sinh hoạt bah ƀon lan rnoi mpôl đê̆ ta Hoà Bình lah ndơ an saơ an nău đăp mpăn mpeh nău dơi kon nuĭh nkrum lam hŏ dơi nchih nkah tâm nkô̆ tâm ton dak bah dih mpeh ntlơi bah ăp nău tâm rmot rnoi nuĭh ma Việt Nam lah dak râng nsum./.