Đại hội druh ndăm ntoh lư ƀư tĭng nău Wa tâl 7 năm 2023 ƀư ntơm bah 25/9 tât 27/9 ta Hà Nội. Râng Đại hội geh 420 đại biểu dơi mbơh nkoch n’hanh mĭn uănh sơch na nê̆ ma âk njuat ƀư, lah ăp nuĭh ntoh lư geh săk ntơ druh ndăm ƀư tĭng nău Wa gưl n’gor ta ăp trong kan êng êng. Đah Đại hội, ăp druh ndăm ndơr ŭch rŏng rgop n’hâm suan nău gĭt blău an neh  dak, ring lam văn hóa Việt Nam luh tât lam ntŭr neh.

Tiến sĩ Trương Thanh Tùng, Kruanh rmôt gŭ mĭn dak si mhe (Viện Gŭ mĭn têh blău mhe Phenikaa), giảng viên Khoa Dược, Nhih nti Đại học Phenikaa (Hà Nội), lah nuĭh ntoh lư tâm rmôt ăp nuĭh khoa học mom Việt Nam n’hanh dak bah dih, yor nô hŏ geh âk ndơ ƀư njêng khoa học geh ring lam têh lam ntŭr neh. Ngoăy tâm  ăp ndơ nê lah ndơ gŭ mĭn geh trong rƀŏng njêng blău ăp ntil dak si mhe n’hanh ăp nău ji ntưp rêng.. Dŭt njrăng, lôch âk năm kơt nti n’hanh gŭ mĭn dak bah dih, TS. Trương Thanh Tùng hŏ plơ̆ sĭt tay ƀon tơm neh dak gay gŭ rêh n’hanh an lĕ nău gĭt blău. Tĭng Tiến sĩ Trương Thanh Tùng, kơt Wa Hồ hŏ tă lah: Druh ndăm lah nuĭh ƀư tơm nău rêh let năp tay bah dak nơm. Jêng, nô ŭch plơ̆ sĭt ƀon tơm neh dak, dŏng ăp nău gĭt tă kơt nti ta ăp dak têh blău, gŭ mĭn, mon njêng ăp ntil dak si mhe rgâl kháng sinh. Tiến sĩ Trương Thanh Tùng, Đại học Phenika Hà Nội nkoch mpeh ăp nău ŭch tât geh ƀư njêng dak si kháng sinh:

(Gâp ŭch rŏng nuĭh Việt Nam he tâm let năp tay mbra mô klach nău dŏng lăn ir dak si kháng sinh đŏng ôh. Tâm ban kơt geh ăp trong sơch êng ƀa ƀă đŏng, dŏng ăp ndơ geh ƀư ma mpôl hên njêng luh gay mô geh chai kháng sinh, kơl dơi ăp nuĭh ji geh chai đah dak si. Trong rƀŏng gŭ mĭn tâl 2 ma gâp dôl ƀư lah dơi geh du đêt nău dơi ngăn nê lah mon njêng dak si săm ji ung thư leng di. Ăp dak si dja lah mbra n’gluh tăch dơi ri mbra hŭch bah ir roh huach prăk dŏng săm an nuĭh ji ung thư, săm ji ung thư uĕh lơn, têk jong nău rêh an nuĭh ji tâm ban păng mô geh khêh).

        Hôm đah nghệ sỹ mom Nguyễn Thị Ngọc Hà (Sơm săk Hà Myo) way blău ƀư mhe, tâm nkre đah ndơ âm nhạc way ơm đah Rap n’hanh nhạc điện tử EDM, ndơ̆ âm nhạc way ơm tât dăch lơn đah ăp băl mom. Nău Ngọc Hà dŭt ŭch rŏng lah mbra ndu văn hóa Việt Nam tâm ban đah ăp dak têh ndrŏng 5 Châu kơt Wa Hồ ŭch rŏng, gay băl mpôl lam ntŭr neh dơi saơ du Việt Nam têh blău mhe, lăp rgum, yơn nha hôm ndjôt du rnoh khlay way ơm văn hóa mha êng. Nkoch mpeh ăp nău nsrôih tâm nău n’glăp nsum xẩm đah rap n’hanh nhạc điện tử EDM, Nguyễn Thị Ngọc Hà an gĭt:

     (2 năm aơ gâp rong an mông nar gay kơt nti du đêt nău mprơ way ơm ƀon lan Việt Nam. Tâm nê geh Xẩm, geh mprơ Xoan Phú Thọ, mpât mprơ Nam Trung Bộ n’hanh du đêt ăp nău mprơ rnoi mpôl đê̆ êng ƀa ƀă bah Việt Nam. Gâp hŏ njuăl tât ăp nuĭh djăt uănh du đêt ndơ geh rklă ƀư âm nhạc, mpeh Xẩm dja n’hanh Xoan Phú Thọ ri geh “Nău pâl í a trời cho”; nău mprơ Mường geh moh lah “Đập nàng Khọt. Nău mprơ ma gâp dŭt ŭch rŏng lah nsĭt âm nhạc way ơm bah Việt Nam tât đah âk nuĭh djăt uănh n’hanh gâp geh nău ŭch rŏng rnôk gâp dơi mprơ ta sân khấu têh lam  ntŭr neh n’hanh dơi saơ nuĭh djăt ŭanh dak bah dih n’hŭn tĭng ăp nău mprơ ƀon lan way ơm bah Việt Nam).

          "Ntŭk ŭch druh ndăm geh, moh ndơ jêr druh ndăm ƀư” nău ntĭnh nkah tât đah druh ndăm bah Wa way lah du trong sŏng an nô Y Xim Ndu, nuĭh Bu Nong, nkuâl Lăk, n’gor Dak Lak. Lôch rnôk nti Đại học, nô Y Xim Ndu hŏ plơ̆ sĭt tay đah ntŭk ƀon tơm neh ntu kro ntang gay ntơm njêng nău kan. Tâm nê, nô nănh dâk hăn lor bôk năp tâm trong kan leo pâl nđaih hăn uănh lăp bri dak, văn hóa n’hanh ndơ sa rnoi  mpôl đê̆; mât ndray n’hanh nkoch n’hơ văn hóa way ơm rnoi nuĭh, lơn lah văn hóa chĭng gong Tây Nguyên. Aƀaơ, doanh nghiệp bah nô Y Xim Ndu nta nău geh wăng sa đăp mpăn mbro an 10 đoàn viên, druh ndăm ta ntŭk:

(He ŭch ndăn dŏng ăp dơh uĕh ơm geh ta ntŭk he mpeh neh ntu bri dak, tơm nuĭh kan ta ntŭk ƀon lan he nơm. Đah ŭch rŏng ntơm njêng nău kan ta ntŭk mbra njêng geh dơi nău nsing nơm, suan ntrôl ntrŭt nsôr an âk rơh kơn băl mom êng ƀa ƀă ndrel hăn tâm rnôk rdâk njêng n’hanh hun hao wăng sa . Tât đah đại hội druh ndăm ntoh lư ƀư tĭng nău wa 2023, he ŭch rŏng mbra tâm bên geh âk đah băl mom, way lah ăp nuĭh dâk hăn lor, mô rlu tiăr nti nuih n’hâm uĕh lŏng, tiăr nti bôk rngok gĭt blău gay ndrel tâm rnglăp n’hanh rdâk njêng, hun hao ƀon tơm he nơm. )

Aơ lah 3 nuĭh tâm rlău 400 druh ndăm ntoh lư, ăp nuĭh ntĭt leo lor tâm kơt nti n’hanh ƀư tĭng nău mĭn, nuih n’hâm, trong gŭ rêh Hồ Chí Minh râng Đại hội druh ndăm ntoh lư ƀư tĭng nău Wa tâl 7- khân păng lah ăp druh ndăm blău nău kan, mbluh joi gĭt trong hăn mhe n’hanh “Geh nău nđơr têh” đah nuih n’hâm nănh mĭn, nănh ƀư, nănh dơn nău kan; rêh geh nău uĕh di, n’groh n’hâm suan gĭt blău an neh dak./.