Tây Nguyên – Me neh têh hvi đah ăp kon nuĭh bêng ler nău tâm rŏng n’hanh nuih n’hâm n’hao êng săk mpeh nău way ơm văn hóa bah he. Yơn ta Tây Nguyên tă geh mô đêt nuĭh ta ăp ƀon lan geh dơh lhui nuih n’hâm tĭng ăp nău bu nsŭk nsôr têk klônh bah mpôl rlơn lơh "Tin lành Đê Ga". Nde tâm nău jêr jŏt wăng sa n’hanh dơh djăt tĭng, mô gĭt wât bah ƀon lan, mpôl dja hŏ nkoch nklă ăp nău tih leh, nsŭk nsôr nuĭh ƀon lan tĭng trong rlơn lơh ngih dak, ƀư jêng nău tâm rkeh rnoi nuĭh. Săk mpôl nơm dja, hŏ geh ntang lơh ma ăp năm khay gŭ rêh mô đăp mpăn dah rŏng n’hanh nău roh chrai rnăk wâl.

Ntơh măt, ăp kon nuĭh hăn tih gung, n’hơt trong nê geh rnôk nkra nău tih, joi tay nău nsing nơm, rdâk njêng tay nău rêh. Nău nsrôih lăp kan bah n’gâng kan ta ntŭk, nău rong an bah ƀon lan, ăp nuĭh tă tih trong hăn, aƀaơ hŏ geh nău rêh mhe. Âk nuĭh tâm rnoh khân păng hŏ lah ăp nuĭh nsrôih râng rlăch ndăng tay ăp nău mplư rlăm bah mpôl rlơn lơh, rgop mât njrăng nău đăp mpăn an ƀon lan. Rmôt phóng viên Nhih pah kan way gŭ kan ta nkual Tây Nguyên – Radio nău ngơi Việt Nam hŏ ƀư du rut nău nchih “Ntơm bah hăn tih trong plơ̆ sĭt đah ƀon lan”.

Nău nchih bôk năp geh moh “Nkah ăp nar tih trong kăl e”, lah nău nkoch bah ăp nuĭh  lăn djăt tĭng nău bu nsŭk nsôr n’hanh ăp nuĭh tĭng nău nŏng êng nơm rlơn lơh tay neh dak, ƀư jêng tâm rkeh ƀon lan n’hanh nău ma khân păng hŏ ntang lơh.

 Tâm năk ŭnh duh răm bah rnăk wâl, ta ƀon Mrông Yố 1, xã Ia Ka, nkuâl Chư Păh, n’gor Gia Lai, wa Rơ Châm Byat nha hôm du đêt đit prêng rnôk nkoch nău tih trong bah he. Năm 2001, păng geh ăp bu nsŭk nsôr n’hanh mplư rlăm tĭng mpôl rlơn lơh tay neh dak "Tin lành Đê Ga". Rnôk nê păng mô gĭt lah aơ lah du mpôl kan mô tâm di, nde tâm chroh rƀŭn gay ƀư ăp nău kan rdâng lơh neh dak. Tâm rnôk păng nha hôm wĭ wĕ ri khân păng way dŏng ăp nău đĭch lêng njŭng rnhôt gay mplư rlăm, lah hăn tĭng khân păng mbra geh nhih brah êng gay rƀŭn, nuĭh Ja Rai mbra geh neh dak êng bah he, dơi ntăm n’hao ƀư kruanh, mât bôk neh ntu têh hvi:

“Khân păng lah dak bah dih mbra lăp rglah n’hanh kơl jêng lơi dĭng klach, djăt ma mât chroh Đê Ga bah he. rnôk nê nơh, păng jao an he 4 ƀon, tât rnôk gĭt ri nê lah tih. He rlơn lơh tay Ngih dak, rlơn lơh tay n’gâng kan, rlơn lơh tay cán bộ... lah he saơ tih. Khân păng ntĭm nti he âk tơ̆ ri he mô djăt”.

Lah kơt wa Rơ Châm Byat ơm năl saơ he tih, ri đah wa Siu Un (59 năm deh), gŭ ta thôn Tân Điệp 1, xã Ia Ake, nkuâl Phú Thiện, nău ntang lơh tât nkai lơn. Lah ngoăy tâm ăp nuĭh tơm bah mpôl “Tin lành Đề Ga” ta Gia Lai, wa Siu Un hŏ geh rmal 16 năm gŭ ndrung yor ƀư rlơ̆ tay đah nău geh bah neh dak.

Bôk năm 2000, wa Siu Un tă geh nchih tâm săk ăp nuĭh n’gâng tơm bah Tin lành Đê Ga ta n’gor Gia Lai. Siu Un mât bôk FULRO gưl nkual, mât bôk tâm rơh ƀư rŭng răng ta Ayun Pa tâm năm 2001gay rlăch dun “nuĭh Yuăn sŏk pit neh bah nuĭh rnoi mpôl đê̆”, ŭch njêng “Ngih dak Đê Ga êng”, leo jă hăn tât nhih pah kan xã gay mpet jâk đah n’gâng kan. Wa Siu Un geh nhŭp tâm khay 2/2001, lôch nê geh rmal 16 năm gŭ ndrung tă bah nău tih “nhŭp kân nuĭh mô nău way pháp luật, ƀư roh đăp mpăn ƀon  lan n’hanh lơh roh rnă njrăng”. Wa  Siu Un nkah tay:

“Tĭng nar ngoăy kâp, kâp mbra geh nuĭh kơl he. Yor he lah nuĭh “mât bôk” lĕ ma nkuâl jêng mpôl leo ƀư rlăng nkah tât he, ân kơl he, nău lư he ntŭk gŭ nklăp mpeh bah ri gĭt. Lôch nê, tâm khay 10/2001 ntơm rmal dôih. Mpôl hên ân gŭ krŭng êng, geh nău mpŏng kâp, geh nău wơl đŏng... Tât năm tâl 5 ri gâp hŏ roh lĕ nău mpŏng”

Ăp năm khay tĭng jăp gŭ ndrung mô dơn lah nău rmal an wa Siu Un ma hôm lah nău rngot nkah rnăk wâl đŏng. Ta ƀon, ur păng – wa Ksor H’Loi, ân du mât kon jê̆ tâm nău rêh krit jêr mô ăp tŏng ăp ntil. Nău ƀư wa Ksor H’Loi ji nuih n’hâm rlău ma nău mplư rlăm bah mpôl tin lành Đê Ga. Mô geh du hê tâm rnoh khân păng tât khâl Siu Un mô lah kơl rnăk păng kơt nău bu nkoch njŭng rnhôt kơt ntơm nơh. Nkah tay ăp nar khay rngot ji nuih n’hâm nê, wa Ksor H’Loi grĭch grĭch dak măt:

“Deh kon bu klô 2 khay ri sai hăn gŭ ndrung, ntlơi êng gâp gŭ ta jay. Oh kon ri dôl hôm nha jê̆, sai gŭ ndrung mô gĭt mhâm mât oh kon. Kon bu ur bôk dak ntơm bah jrô 6 tât jrô 9 dơn geh du blah kho ao dơm. Păng rngot! Ngih dak n’hanh ăp cán bộ rgŏ jă he lơi rvê ân mât chăm oh kon he. aƀaơ sai gâp hŏ sĭt đah rnăk wâl. Kon bôk dak lah: Bơ̆ hơi bơ̆ bơ̆ hŏ geh nău tih đah Ngih dak đah n’gâng kan hôm ri aƀaơ bơ̆ ƀư ăp nău kan uĕh di dơm”.

Tâm ăp năm 2001, 2004, 2008 ta Tây Nguyên lah êng n’hanh n’gor Gia Lai lah nsum, ta nâm nău choh chôl, nsŭk nsôr, têk klônh, dâk kơl bah ăp bu êh rkeh dak bah dih kuăl lah “Hội thánh Tin lành Đề Ga” hŏ têk klônh nuĭh ƀon lan hăn ƀư ăp rơh rŭng răng ƀư nău lư lam rêh jêng kon nuĭh dŭt n’hâm nuih ăl. Trong ƀư bah mpôl dja lah nkoch nklă trong kơl bah Ngih dak, tâm jêng nău tâm rkeh, sui găr ntil tâm nuih ăl. Nău kan bah khân păng ntlơi an tay ăp nău rngot ji an hang rbăn rnăk wâl, ăp nuĭh tâm mpôl tih hŏ geh ntang lơh nhiăl rmal an ăp nău kan tih djơh bah he. N’hanh I ngăn, khân păng lah nuĭh geh bu nde nsŭk nsôr dâk bah kơi mpôl kan dja.