Di 2 năm lăp dŏng kan, Ntŭk rgum groi nđôi, mât bôk kan nkual ƀon têh ăp tŏng nău lư n’gor Dak Lak hŏ ntik nău dơi tam buăt nthoi nău lư đah nuĭh ƀon lan, doanh nghiệp đah nhih pah kan ngih dak, rgop kơl pah kan mât bôk kan n’hanh nkra nău kan bah ăp nhih pah kan geh nău dơi kan kloh rvah, năn ngăch.

Ntŭk rgum groi nđôi, mât bôk kan nkual ƀon têh ăp tŏng nău lư Dak Lak (way kuăl lah Dak Lak IOC) lăp dŏng kan ntơm bah khay 9/2021. Lôch 2 năm kan, nchuăt dŏng Dak Lak pơk ƀư bah ngai geh bơi 30.000 tơ̆ pơk lăp. Cổng thông tin http://tuongtaccongdan.daklak.gov.vn/ mbơh gĭt kloh lôch  jêh ƀư siƀŭt dơi geh nău uănh khlay bah âk mpưm ƀon lan. Yuh Trần Lệ, ta phường Thắng Lợi, nkual ƀon têh Buôn Ma Thuột uănh năl:

Phần mềm dja cài đặt dơh ntơ, rnôk pơk lăp dŭt dơh uănh. Mpeh dơh dŏng ri dŭt âk geh nău dơh uĕh. Ntĭt kơt camera pơk uănh sŏng dăng bah ngai. Aƀaơ lơn  âk ăp nuĭh mâp jêr jŏt rnôk he hao ƀư ăp ntil siƀŭt, nơm geh phần mềm dja he mbra ndơ̆ na nê̆ hồ sơ lăp n’hanh geh ăp đơn vị pơk uănh bah ngai khân păng mbra dơn hồ sơ n’hanh nkra ƀư n’hanh he gĭt dơi rnoh ngăch nkra hồ sơ mhâm ƀư. Nuĭh ƀon  lan tải ứng dụng dja sĭt ri saơ dŭt dơh uĕh mbra groi nđôi dơi ăp nău kan bah ăp nhih pah kan”.

Wa Võ Nguyễn Hoàng Nam, Groi Giám đốc mât uănh Ntŭk rgum kan groi nđôi IOC n’gor Dak Lak an gĭt, tât aƀaơ, đơn vị hŏ ƀư lôch jêh n’hanh n’glăp dŏng rlău 450 măt camera ta âk ntŭk lam nkual ƀon têh Buôn Ma Thuột n’hanh 1 đêt nkuâl, thị xã tâm n’gor. Rup gui rhôp bah ăp camera dơi nthoi tât ntŭk rgum prăp nău lư tât ntŭk rgum groi nđôi mât bôk kan nkual ƀon têh ăp tŏng nău lư bah n’gor. Bah meng nê, công nghệ trí tuệ nhân tạo dơi rgum lăp tâm lam rêng phần mềm tổng đài 1022 n’hanh 10 ndơ rhŏ dŏng khlay. Ăp ndơ rhŏ dŏng dja bôk năp hŏ ntik dơi nău khlay kan lah jâng nsing glo tơm an jêng du nkual ƀon têh ăp tŏng nău lư. Wa  Nguyễn Võ Hoàng Nam an gĭt:

“Ndơ rhŏ dŏng an nkual ƀon têh ăp tŏng nău lư lah trong tâm dâl nău đah n’gâng kan n’hanh ƀon lan, gay mhâm ƀư ƀon lan geh dơi trong tâm dâl nău tơm đah n’gâng kan tâm nê mbra rgum tâm nău nkoch ăp nău dăn đă bah nuĭh ƀon lan, ăp ndơ ma nuĭh ƀon lan wăk kol mpeh đăp mpăn, rnă njrăng hăn ntung trong, ntŭk gŭ rêh mpeh lĕ rngôch ăp ntil nău geh wăr kiău ma ăp ntil nău mô hŏ tâm di tĭng di  quy định ri mbra dơi nuĭh ƀon lan mbơh nkoch tât ntŭk rgum nău kan groi nđôi IOC”.

Trong kan dja nar lơn ma dơn geh âk nău nkoch bah nuĭh ƀon lan ta ăp ntŭk njuăl tât. Bah nê, kruanh rđău kan ăp nhih pah kan hŏ djăt nău  rgop bah nuĭh ƀon lan, doanh nghiệp, groi nđôi dơi nău  kan n’hanh rnôk nkra ƀư, ntrŭt ntrôl, nkah ăp mpôl dơn nău kan. Wa Trần Xuân Tiệp, Groi chánh Văn phòng UBND nkuâl Cư M’gar, an gĭt:

Nău tâm dâl đah ăp nkuâl n’hanh sở thông tin truyền thông hŏ mpơl dơi nău tam. Du đêt nău lah bah nuĭh ƀon lan njuăl tât dơi IOC mplơ̆ sĭt nkuâl n’hanh mbơh nkuâl nkra năn ngăch”.

Tĭng wa Trương Hoài Anh, Giám đốc Sở Thông tin – Truyền thông n’gor Dak Lak, Ntŭk rgum kan, groi nđôi mât bôk kan nkual ƀon têh ăp tŏng nău lư n’gor Dak Lak hŏ kơl an pah kan mât bôk kan n’hanh nkra nău kan bah  ăp nhih pah kan dơi kan ƀư kloh rvah, ngăch, geh nău tam. Nkre lah ntung njŏ tâm ơh dâl nău 2 ding rnôk nuĭh ƀon lan mbra njuăl nău rgop, mbơh mô lah nkoch an ăp nhih pah kan Ngih dak mpeh ăp nău tât, nkô̆ nău geh tât rĭng grep nkual ƀon têh, ntung trong hăn, rnă njrăng, ndơ dŏng kỹ thuật bah n’gor. Gay lôch jêh ăp rêng kan ntŭk mât prăp nău lư ta jâng nsing mbrô ta ntŭk rgum kan, wa Trương Hoài Anh an gĭt:

“Ntrŭt nsôr ăp nkuâl geh ndơ mbra tĭng kơn ntuh kơl gay ntŭk rgum mât bôk kan IOC êng bah he gay lăp rlai nsum IOC bah n’gor gay mhâm ƀư gay tŏng đah nău ŭch geh nău rđău  kan tâm ban kơt nău tât râng mât uănh ngih dak bah nuĭh ƀon lan n’hanh doanh nghiệp ta n’gor”./.