Grêt dăch tĭng nkô̆ pah kan năm 2023 bah Điện lực Việt Nam mpeh nău “Tĭng ƀư mpêt nkrem- njrăng bah mpŭng lir”, Công ty điện lực Dak Lak hŏ rgum ăp kôp ăp nău kan, trong nkra tâm 5 trong kan rgum tơm lah: Ƀư njêng tăch rgâl; ntuh kơl rdâk njêng; mât dŏng drăp ndơ; mât dŏng, lơh joi, dŏng ndơ mpêt khlay n’hanh mât njrăng ntŭk gŭ rêh; mât uănh, dŏng nuĭh kan n’hanh mông nar kan. Tĭng nê, công ty hŏ an ƀư dăng nău mât n’hanh hŭch bah ir roh huach điện, n’hao dăng pah kan uănh năl trạm biến áp, rgâl glêh uĕh ndơ weh kơp, muĭh soih aih trong rse nsrôih hŭch bah ir roh huach điện năm 2023 jŭr ta nâm 4,6%.

Tâm ntuh kơl rdâk njêng, đơn vị hŏ ôp ŭanh, rgum an ƀư lor ta du đêt ntŭk kan khlay kơt: Ƀư lôch jêh trong rse điện nkual mpeh bah lơ nkual ƀon têh Buôn Ma Thuột; Rdâk njêng trong rse tâm rsong ƀoh trong rse điện trung áp ta nkual ƀon têh Buôn Ma Thuột n’hanh ăp nkuâl Krông Pắk, Cư M'Gar, Ea Kar; N’hao rnoh nsing nơm pă an điện an ăp trong rse 110kV n’gor Dak Lak… Tâm pah kan tăch rgâl, tât aƀaơ, lĕ rngôch năch dŏng điện ta Dak Lak hŏ dơi rgâl công tơ điện tử; nkre tĭng ƀư keh mbrô, kloh rvah nău weh kơp rnoh âk dŏng điện ăp nar, an ƀư nău way trong kan “du mpông mbluh rloh” đah n’gâng kan điện n’hanh nhih pah kan mât ŭanh ngih dak, kơl nuĭh ƀon lan dơh tât đah ăp ntŭk rhŏ dŏng điện.