Kơp ntơm bah bôk khay 9/2023, n’gor Gia Lai mhe n’gluh geh rlău 1000 rmen prăk, tâm ban đah 25% trong nchrăp tơm prăk ntuh kơl năm 2023. N’gor dôl nsrôih droh rklaih jêr jŏt lơn lah nkô̆ nău mô tŏng neh tuh n’hanh nău mbrơi đă ntrơn du.  

Lôch nklăp 1 năm ƀư, yơn ntŭk nchrăp ƀư trong Nguyễn Chí Thanh, gâl hăn bah trong Trường Chinh tât trong Lê Duẩn, nkual ƀon têh Plei Ku, mhe n’gluh geh 1,5 rmen prăk tâm  lĕ rngôch rnoh dơi tâm pă lah 185 rmen prăk, geh 3,6%. Ta Pkei Ku đŏng, ntŭk nchrăp ƀư trong Nguyễn Văn Linh, mhe n’gluh geh bơi 27% tâm lĕ rngôch tơm prăk 100 rmen prăk bah năm. Hôm ntŭk nchrăp ƀư trong me mpeh luh nar (trong der quốc lộ 19)- ntŭk nchrăp kan tơm khlay bah n’gor, geh tơm prăk 1200 rmen prăk, mhe n’gluh geh 3,6% dơm đŏng.

Lĕ 3 ntŭk nchrăp kan dja geh mbrơi da dê, yor ndrel 1 nkô̆ lah mô hŏ ƀư lôch jêh đă ntrơn du, mô hŏ ndơ̆ jao an đơn vị ƀư. Wa Phan Việt Tân- Groi jrô kan mât uănh trong nchrăp kan tuch tăm, mpeh Ban mât uănh ntuh kơl Rdâk njêng n’gor Gia Lai, an gĭt, tĭng quy định bah Luật ntuh kơl, rêng ƀư ntrŏng năl rnoh khlay neh gay đă ntrơn du ân ƀư âk gâl, jêng tât nău mbrơi nkai:

“Aƀaơ dôl kâp đă ntrơn du. Lơn âk ăp ntŭk (nkuâl Đăk Đoa, n’hanh  nkual ƀon têh Pleiku) hŏ ƀư lôch jêh weh kơp tâm n’glĕ nău tât bah ntŭk nchrăp ƀư trong da dê. Yơn aƀaơ, dôl kol ta nău ntrŏng rnoh khlay neh na nê̆, jêng ân đă đơn vị mbơh nti trŏng năl, gay Sở Tài nguyên Môi trường uănh an dŏng. Lôch rnôk đơn vị ƀư lôch jêh, ri  mbra n’gluh tay tơm prăk ntop tay rnoh âk nău kan. Yơn tât aƀaơ ri mô dơi tât trong nchrăp ndơ̆ luh”.   

Bah meng nkô̆ kol đă ntrơn du ntŭk ƀư, ri nău mô tŏng neh tuh ƀư mô đêt trong nchrăp kan ta Gia Lai mbrơi ƀư. I ngăn, ta n’gor Gia Lai geh 4 ntŭk tơm neh tuh dơi an lơh dŏng n’hanh  5 đang jâk lŭ dơi an lơh dŏng nkre. Yơn lơn âk tơm lŭ neh dja gŭ ngai đah ntŭk ƀư ŭch geh neh tuh bôr âk. Tâm âk khay rlău aơ, n’gor Gia Lai hŏ tâm rlong ndranh, ŭanh an, ƀư siƀŭt an lơh dŏng ăp tơm neh gay dŏng an ăp ntŭk nchrăp kan, yơn tât aƀaơ nkô̆ nău dja nha mô hŏ nkra lôch jêh. Wa Nguyễn Văn Quảng- Ntơh măt đơn vị ƀư trong Công ty Cổ phần rdâk njêng công trình 510, mât uănh ndranh ƀư mbrô 7, njăr trong me mpeh luh nar nkoch nău jêr jŏt bah đơn vị tơm ƀư:

“Ndranh ƀư mbrô 7 geh 3 ntung n’hanh 1,5km trong, tât aƀaơ mhe geh 1 dâm ntung M2 ta Biển Hồ lah dơi an ƀư dơm. Tâm 1,7km trong, ri nuĭh tơm ntuh kơl mhe  jao 500m trong, nuĭh tơm ƀư ndranh dôl an ƀư, yơn mô hŏ geh tơm neh tuh dơi nchŏng đă gay sŏk tuh. Ŭch ntrôl ngăch ƀư ri dŭt khlay lah ân geh neh tuh bôr.”

Nău dŭt rlơn ta Gia Lai lah lĕ ma du ntŭk nchrăp  kan đăp mpăn đăp mpăn rnoh ngăch, mâp kŏ kol tâm trong n’gluh tơm prăk đŏng, yor n’gor.. mô tŏng prăk! Aơ lah nău ngăn geh ta ăp ntŭk nchrăp kan dŏng prăk dŏng neh n’hanh an manh neh, rnôk 2022 tât aƀaơ, ntŭk tăch rgâl neh ntu krât gâng, n’gor geh hŭch tơm sŏk geh prăk dja . wa Trương Hải Long- Kruanh UBND n’gor Gia Lai an gĭt, ăp n’gâng kan, ăp nkuâl tâm n’gor dôl ndăn joi trong nkra droh rklaih jêr jŏt:

Sở Kế hoạch n’hanh Đầu tư lah nhih pah kan rnâng kan an 3 rmôt pah kan ndăn hao rblang dăn gưl geh nău dơi kan tâm pă ăp tơm prăk hôm ƀa ƀă; lôch jêh ăp siƀŭt ntuh kơl, ntrôl ngăch đă ntrơn du rong neh an ntŭk ƀư n’hanh ntrơn du ntŭk gŭ mhe. Sở Kế họach n’hanh Đầu tư ƀư tơm, kan nsum đah ăp tơm nuĭh ntuh kơl, n’gâng kan, nkuâl rgum droh rklaih ăp jêr jŏt tâm nău an ƀư ăp bôk nău kan dâk tay n’hanh hun hao wăng sa- rêh jêng kon nuĭh n’hanh 3 bôk nău kan gưl neh dak. Nchrăp ăp nkô̆ nsŏng kơl an UBND n’gor gay ƀư tâm nchră ŭanh năl droh rklaih ăp kŏ kol bah năp nar 20/9/2023”.