Tâm 9 khay bah năp, nău pă an prăk ntuh kơl nsum ta n’gor Gia Lai mhe geh rlău 30%. Aơ lah du nkô̆ nău dơi ndơ̆ an ôp ta rơh rƀŭn HĐND n’gor Gia Lai ôi 1/10. Tĭng nău mbơh bah UBND n’gor Gia Lai, tât aƀaơ rnoh pă an prăk ntuh kơl nsum bah n’gor mhe geh 31,2%, đêt lơn rnoh rĭng geh bah lam dak. Âk ntŭk, n’gâng kan, nău kan ngăch pă an prăk ntuh kơl nsum dŭt mbrơi.

Tâm nĕ, N’gâng kan Tuch tăm mât rong n’hanh hun hao ƀon lan, N’gâng kan dak si, N’gâng kan Văn hóa-Thể thao n’hanh pâl nđaih, rnoh pă an prăk mô hŏ tât 10%. Ăp nkô̆ nău khlay jêng tât nău mbrơi dŭt âk yor wăk kol trok, sŏk neh, mô tŏng lŭ loih choih xi măng; âk nău nchrăp ƀư dôl tâm lvang nchrăp ntuh kơl mô dah an rgâl.