Ndơn kan an ăp đồng chí leo kan Đảng, ngih dak ryơk n’hao pă Huân chương lao động hạng Ngoăy an Đảng bộ n’gâng kan n’hanh ƀon lan nkuăl têh Phước Long, Tổng Bí thư Tô Lâm mpơl nău lah ueh dŭt n’hâm an nău kan lah ueh ăp Anh hùng liệt sĩ, ƀon lan, đồng chí lĕ têh dăng geh nău tâm lơh khĭt ji mât đăp mpăn an nkual neh “Nkual neh mpeh luh nar âk nău jêr ma têh dăng”, an nău kan rklaih đăp mpăn- dơn ngoăy neh dak. Tổng Bí thư rnê n’hanh rhơn âk ăp nău dơi geh ma n’gor Bình Phước lĕ dơi geh tâm 50 năm rklaih đăp mpăn. Bâh du ntŭk geh ndơ dŏng mô ueh mô rŏng, nău wăng sa jê̆, nău rêh ƀon lan dŭt jêr, Bình Phước lĕ n’hanh dôl rgâl mhe ăp nar gay ma jêng nău nsrôih gay ma hun hao bâh lĕ nkual. Tổng Bí thư đă ta ntŭk an geh n’hao tay nău dăng, nău mĭn, nău gĭt blău, n’hanh soan dăng bâh lĕ rmôt tâm rnglăp lĕ mpôl rnoi gay ma mbơh kan, rgum kan n’hanh dŏng geh săk rnglăy  ăp rnoh nuĭh kan ta ntŭk rêh jêng, ntrôl dăng naư ueh mhe, rgâl mhe rnoh mbrô gay ma hun hao rnoh pah kan jn sa an hun hao mhe, n’hao nău tâm rgop ta nkual bâh hun hao ndơ dŏng ntung trong tơm khlăy, njêng âk nău pah kan n’hanh n’hao nău geh an tơm prăk, n’hao nău ueh tâm nău rêh an ƀon lan.