Kêng măng ntri (6/1), Tổng Bí thư Tô Lâm, Bí thư Quân uỷ Trung ương hŏ tât khâl n’hanh pah kan đah Quân đoàn 34 - Quân đoàn mhe njêng bah Quân đoàn 3 n’hanh Quân đoàn 4, tĭng trong rƀŏng “đăng, glêh, dăng” tĭng Nghị quyết bah Bộ Chính trị mpeh nău kan tahen ƀon lan Việt Nam. Mpư rnê ăp nău dơi bôk năp di ma rhơn, Tổng Bí thư Tô Lâm lah rjăp, let năp tay, Quân đoàn ân đăm jru n’hanh tĭng ƀư jăp nău ntrŭnh 35 bah Bộ Chính trị mpeh Đại hội đảng ăp gưl hăn tât Đại hội đại biểu lam dak tâl XIV bah Đảng.

Rgum nchrăp n’hanh ƀư geh nău dơi đại hội Đảng ăp gưl năm kan 2025 - 2030, đăp mpăn geh nău tâm ban, tâm rnglăp, dơn ngoăy. Kan nsum lhăt nău dăp rgum gưl ủy mpôl kan đảng đah dăp rgum ăp tŏng rmôt cán bộ n’hanh nhih pah kan, đăp mpăn lôch bah kơi đại hội, ăp mpôl kan đảng ngăch ntik n’hao nău khlay kan rđău đă nhih pah kan nkra bah jêr jŏt, lôch jêh ngăch nău dơn kan, rgop rdâk njêng mpôl kan đảng kloh uĕh nâp dăng mpeh chính trị, nău mĭn, nuih n’hâm, leo ƀư n’hanh cán bộ, rdâk njêng đơn vị nâp dăng lam lĕ rngôch “ntĭt leo, ntoh lư”.

 Kêng măng ndrel nar, Tổng Bí thư Tô Lâm tât khâl n’hanh pah kan đah Binh đoàn 15 mpeh lôch jêh tĭng ƀư nău dơn kan wăng sa rêh jêng kon nuĭh njrăng n’gang neh dak rnă njrăng.