Ôi 6/1, UBND n’gor Dak Nông ƀư hop báo, mbơh nău lư mpeh nô nău wăng sa rêh jêng kon nuĭh năm 2024 n’hanh trong nchrăp năm 2025 bah n’gor. Tĭng nău mbơh, năm 2024, bol mâp dŭt âk jêr jŏt, yơn n’gor Dak Nông nha hôm geh nău dơi dŭt nkah uĕh tâm trong hun hao wăng sa –rêh jêng kon nuĭh.

N’gluh tơm prăk ntuh kơl bah n’gor Dak Nông dâk bôk năp tâm nkual Tây Nguyên, đah rnoh âk 90% tâm lĕ rngôch rnoh 3.500 rmen prăk tơm prăk nchrăp. N’hŭch ach o bah n’gor mât tay ta rnoh dâk bôk năp lam dak, aƀaơ hôm nklăp 3% rnăk ach o. Play jŭr geh, rnoh khlay hao ăp ntil ndơ tuch tăm tơm kơt cà phê, tiêu, sầu riêng kơl rĭng geh tĭng bôk nuĭh hao dŭt âk bah ntơm tât aƀaơ, aƀaơ geh 81,6 rkeh prăk/nuĭh/năm, dâk tâl bar nkual Tây Nguyên (bah kơi n’gor Lâm Đồng). wa  Hồ Văn Mười, Kruanh UBND n’gor Dak Nông an gĭt, năm 2025 n’gor mbra an ƀư rdâk njêng ntơm bah 1 tât 4 nhih máy nkret njêng bô xít- alumin- nhôm, rnoh khlay ăp nhih máy mô bah dâng 1 rmen USD. Đah tơm ndơ ntuh kơl nklăp 8 rmen đôlar, mbra nta trong dơh an n’gor Dak Nông hun hao dăng lơn tâm let năp tay.