Tâm bah ri aơ nơh, nău tĭng ƀư Nghị quyết 18 mpeh dăp rgum, glêh tam nuĭh kan hŏ jêng nău dơn kan rgum  tơm tâm pah kan rgâl dơh glêh siƀŭt ta n’gor Dak Lak mô di lah nău mha êng bah dih ơm. Dơi ntrŏng lah du rơh cách mạng, nău dăp rgum, glêh tam nuĭh kan mô dơn lah nău ŭch geh mpeh măt dăp rgum ma hôm lah njuat hăn  khlay gay n’hao nău dơi tam mât bôk kan, hŭch bah kưn, njêng luh lam rêng kan chính trị n’gơch ngăch.

Ngoăy tâm ăp ntŭk ntoh lư tĭng ƀư Nghị quyết 18 ta Dak Lak lah ăp nău kan n’glăp dơn ngoăy ăp nhih pah kan, gay dăp rgum, glêh tam nuĭh kan ma mô ƀư hŭch săk tam nău kan. Wa Trương Hoài Anh, Giám đốc Sở Thông tin n’hanh Truyền thông n’gor Dak  Lak, an gĭt nău n’glăp Sở Thông tin n’hanh Truyền thông đah Sở Khoa học Công nghệ hŏ dơi an ƀư du trong ăp kôp n’hanh geh nău dơi tam. Lĕ bar sở hŏ ƀư âk rơh hop gay tâm ban ŭch dơn ngoăy trong n’glăp nsum, rdâk njêng Đề án hao rblang dăn rmôt pah kan bah năp nar 10/1/2025.

 “Sở hŏ mbơh an lam lĕ rngôch cán bộ công chức, viên chức n’hanh nuĭh kan tâm  lam nhih pah kan. Đah nău n’glăp 2 sở lah Sở Thông tin n’hanh Truyền thông n’hanh Sở Sở Khoa học Công nghệ ri Ủy ban n’gor hŏ njêng 1 rmôt pah kan n’hanh tât aƀaơ rmôt hŏ hop n’hanh 2 ding hŏ rdâk njêng Đề án n’hanh hao rblang dăn an rmôt bah  năp nar 10/1/2025 n’hanh mbra hop rmôt gay uănh an dŏng Đề án bah năp nar 15/1 gay mbơh an Ủy ban n’gor n’hanh Tỉnh ủy tĭng di quy định.”

Ta nkuâl Cư M'gar, wa Trần Đình Nhuận, Bí thư Huyện ủy, an gĭt tĭng ƀư Nghị quyết 18, Cư M'gar hŏ n’glăp Trung tâm văn hóa thể thao đah Đài truyền thanh, n’glăp geh 8 đơn vị nhih nti, hŭch 8 thôn buôn n’hanh bôk năp hŏ hŭch dơi 10% cán bộ viên chức lam nkuâl. Tâm let năp tay, nkuâl Cư M'gar dăn đă âk trong n’glăp êng ƀa ƀă đŏng, kơt n’glăp dơn ngoăy ăp Trạm mât rong, tuch tăm, mât njrăng si tăm jêng du Ntŭk rgum rhŏ dŏng nău kan tuch tăm mât rong mpeh nkuâl mât... Ăp nău rgâl dja mô dơn hŭch đêt bôk kan ma hôm kơl ăp nhih pah kan, đơn vị kan geh nău tam lơn.

“Rnâng kan Huyện ủy hŏ mâp ăp oh nô hôm bah dâng 5 năm kan gay rƀah gĭt nău ŭch rŏng n’hanh rƀŏng nău mĭn gay rgŏ jă ăp cán bộ rlu ranh bah năp năm deh geh ndơ kơl tĭng quy định, tât aƀaơ geh 1 du hê Kruanh jrô kan n’hanh 5 groi ban, groi jrô kan hŏ geh siƀŭt dăn rlu kan bah năp năm deh.”

Wa Bạch Văn Mạnh, Giám đốc Sở Nội vụ n’gor, lah rjăp đŏng, lôch 7 năm tĭng ƀư Nghị quyết 18, n’gor Dak Lak hŏ hŭch geh 10% biên chế rđĭl đah năm 2015, hŭch 30 jrô kan, chi cục mpeh ăp sở, n’hanh hŭch 40 jrô kan n’hanh đơn vị tâm ban nê mpeh ăp chi cục. Aơ lah du nău dơi di ma nchih nkah, mô dơn mpơl nău nsrôih tâm nău hŭch glêh tam nuĭh kan ma hôm đăp mpăn geh nău dơi tam mât bôk kan tâm rnôk ăp nău ŭch dơi nar lơn ma âk đah nuĭh kan. Tâm let năp tay, Dak Lak tĭng ƀư tay ăp trong n’glăp nsum dơn ngoăy du đêt n’gâng kan, gay hŭch đêt bôk kan n’hanh n’hao săk tam mât kan. Wa Bạch Văn Mạnh an gĭt:

“Mpôl hên hŏ ƀư wat jêh đề cương lor bôk năp n’hanh leo ƀư jêng rpaih săk, UBND n’gor hŏ rđău đă Sở Nội vụ kan nsum đah ăp n’gâng kan dơi kan njêng 8 rmôt dăp rgum ăp tŏng lam lĕ rngôch, tâm nê jă Kruanh râng 2 rmôt n’hanh ăp Groi kruanh UBND râng ăp rmôt kan gay tâm ban ŭch dơn ngoăy. Âk rmôt hŏ rgum hop tâm ban ŭch hôm. Ƀư dŭt ndăn ngăch”.

Tỉnh ủy Dak Lak hŏ ntrŏng năl nău tĭng ƀư Nghị quyết 18 lah nău dơn kan khlay mha êng, mô dơi ntruch mbrơi nkai. Wa Nguyễn Đình Trung, Bí thư Tỉnh ủy, lah rjăp: "Aơ lah du rơh cách mạng mpeh glêh tam nuĭh kan, lơn ma ƀư ngăch lơn ma nsĭt geh nău dơi an hun hao bah neh dak." N’gor Dak Lak dŏng trong rƀŏng “Nkre nchuăt nkre dăp mbor”, rgum  tâm nău an ƀư nău kan đah nău nsrôih âk, nkre đăp mpăn geh nău ăp kôp, dơn ngoăy đah ăp gưl n’gâng kan, bah trung ương tât tâm dâng:

Rgâl mhe, dăp rgum nuĭh kan bah lam trong kan chính trị glêh tam, kan geh nău dơi ngăch yach lah nău dơn kan khlay mha êng, lah rơh cách mạng mpeh glêh tam nuĭh kan lam trong kan chính trị, ndrel đah dŭt âk jêr jŏt, dơh jêng nuih ăl geh tât nău dơi, nău ŭch rŏng, mpŏng geh bah cán bộ, công chức, viên chức, nuĭh kan tâm lam trong kan chính trị. Ân geh nău tâm rnglăp, dơn ngoăy, du nuih n’hâm ŭch, nsrôih âk yor ma nău geh nsum bah n’gor.

Đah nău nsrôih bah lam trong kan chính trị, ntơm bah n’gor tât nkuâl, n’hanh nău rđău đă grêt dăch bah ăp gưl kruanh rđău kan, Dak Lak dôl nsrôih tĭng ƀư Nghị quyết 18 đah nuih n’hâm "rgâl mhe, dăp rgum nuĭh kan bah lam trong kan chính trị glêh tam, kan yach ngăch, nsĭt geh nău dơi ngăn". Ăp nău ƀư dơi an saơ nău nsrôih, du nuih n’hâm tâm bah ŭch, bol ma jêr jŏt, n’gor Dak Lak mbra hăn di tay trong rƀŏng n’hanh njêng jâng nsing nâp an nău hun hao tâm let năp tay.