Kêng măng ntri (6/1), Thủ tướng Phạm Minh Chính hŏ mâp măt HLV Kim Sang Sik n’hanh rmôt chưng play Việt Nam ta Văn phòng Chính phủ lôch rnôk rmôt chưng play hăn tât Văn phòng Chính phủ, đah nău dơi dâk bôk năp ASEAN Cup 2024. Thủ tướng Phạm Minh Chính rhơn n’hanh rnê âk ăp nău nsrôih bah Ban huấn luyện, mât bôk lah HLV trưởng Kim Sang Sik n’hanh lĕ rngôch nuĭh sơch lăp tâm rmôt chưng play Việt Nam hŏ rlău dơi jêr jŏt, ntul rlong gay dâk bôk năp ASEAN Cup 2024, di đah nuih n’hâm mpŏng kâp n’hanh nău ŭch rŏng bah nuĭh ƀon lan Việt Nam, nsĭt tay rhơn n’hao an neh dak. 

Thủ tướng lah rjăp, nău dơi dja mô dơn lah nău n’hao êng săk bah thể thao Việt Nam ma hôm lah tơm nđơr an lam rnoi nuĭh, mpơl nău nđơr hao n’hanh tât chông prêh mhe. Ta rơh mâp măt Thủ tướng Phạm Minh Chính ntơh măt kruanh rđău kan Đảng Ngih dak ntăm an Huân chương Lao động Hạng nhất an Rmôt chưng play gưl neh dak. Ntăm an huân chương lao động hạng 3 an 6 nuĭh tâm rlong tâm rmôt chưng play gưl neh dak lah ăp cầu thủ Duy Mạnh, Quang Hải, Tiến Linh, Hoàng Đức, Đình Triệu, Nguyễn Xuân Son.