Lôch 32 năm njêng tay, n’gor Lào Cai dâk bôk năp tâm 14 n’gor trung du n’hanh gôl yôk mpeh ba lơ. Nău ngăch hun hao wăng sa râng geh bơi tât 10%/năm, lĕ rnoh geh tơm prăk ngih dak ta ntŭk geh rlău 10 rbăn rmen prăk, rnoh rnăk ach o ngăch bâh 54,8%  năm 1991 jur hôm 19,3%.

Tâm nău nti n’hanh pah kan tĭng nău Wa Hồ, Đảng bộ n’hanh ƀon lan ăp mpôl rnoi Lào Cai lĕ leo kan, nsrôih joi gĭt, geh trong kan ueh di đah nău ơm geh ntrŭnh nuĭh hăn lor bôk năp an cán bộ leo kan tơm n’hanh nuĭh leo kan, geh nău ntrŭnh êng mpeh nău nti n’hanh pah kan tĭng Wa. Bâh năm 2016 tât aƀaơ, lam n’gor Lào Cai lĕ geh rnê nkhôm an 3 rbăn 356 ntŭk kan, nuĭh kan geh nău dơi mpeh nău nti n’hanh pah kan tĭng nău Wa Hồ. Groi kruanh dak Võ Thị Ánh Xuân nkah mbơh: Đảng bộ n’gor Lào Cai an geh ăp trong kan răng dăng n’hao nău dơi tâm rnglăp, nkre lah geh ăp nău kơl kan, trong kan kơl an tâm di, n’hanh ndâk nsơm gay ma ƀon lan hun hao êng đah mpang ti nơm, mhâm ƀư gay ma ƀon lan ăp mpôl rnoi hun hao tâm ban n’hanh geh dơn ăp nău dơi geh hun hao bâh ngih dak.