Dŭt kêng măng 19/9, ta ntŭk kan Chính phủ, Groi Thủ tướng Trần Lưu Quang pah kan đah Uỷ ban đăp mpăn gung trong neh dak. 9 khay rlau aơ, nau kan mât đăp mpăn gung trong hŏ geh nau ueh đŏng rđil năm 2022; nau tâm tom ndeh geh nkân âk. Lam dak hŏ geh rlau 8.300 tŏ tâm tom ndeh, huch 194 tŏ ndrel huch 124 nŭih khĭt rđil đah rơh aơ năm e. Rnoh nkol trong hăn tâm ăp trong tơm tâm ăp mông âk nŭih hăn ro, lễ, tết huch hô rđil rơh aơ năm 2022.

Tâm nar pah kan, Groi Thủ tướng Trần Lưu Quang mbơh nkô̆ nau tâm 3 khay dŭt năm ân huch nau tâm tom ndeh ntơm 5-10% tâm lĕ 3 nkô̆ nau kan, rklaih nau kol trong hăn tâm ăp trong tơm, ăp tơm lăp hăn geh ntŭk âk ndeh, tâm ăp đô thị têh ndrel mô ân geh nau kol trong hô jŏ jong. Tĭng Groi Thủ tướng, nau kan mhal ba kơi đah ăp nŭih tih hăn trong hŏ geh ƀư jêng nau ueh, nkre đă ăp n’gâng kan, ntŭk kan rgum ƀư 8 rmôt nau kan tơm gay nchrăp luh gay đăp mpăn nau hăn trong./.