Mhe uănh nđôi duh nđik tâm ntŭk mât tăm sêt nđik đông trung hạ thảo, nô Đoàn Quốc Anh Khôi, Giám đốc hợp tác xã Đông trùng hạ thảo Kon Tum an gĭt, gay sêt đông trùng hạ thảo hun hao uĕh, nău pơk nđik tâm jrô kơt trong krih êng dak lah dŭt khlay. Yor nê, nô lĕ nglăp rwăt ăp ndơ công nghệ nkra njêng mhe, gay geh ndơ uĕh kah âk.

Ndrel đah nĕ, hợp tác xã uănh khlay kơt dŏng công nghệ thông tin tâm ndâk ƀư, mpla nsơ rup gui, ntrŭt ngăch tăch ndơ đah trong ndơ̆ ndơ ta ăp ntŭk tăch điện tử. Knơm nĕ, lĕ dơi gĭt tât đah âk nuĭh tâm dak, nsĭt geh âk rlău 2 tât 3 tơ̆ nkôp đah bah năp đaơ. Nô Đoàn Quốc Anh Khôi an gĭt:

Gĭt saơ nuĭh ƀon lan rgâl trong ƀư rwăt ndơ ri hợp tác xã lĕ ƀư livesteam n’hanh tăch ta lĕ rngôch ăp ntŭk tăch điện tử geh aƀaơ ta Việt Nam ri dơi geh prăk an hợp tác xã n’hanh dơi hao nău geh bah 15 tât 20% an nuĭh kan ăp khay.

Nău kơt dŏng “rgâl mrô” mô hôm mha đah ăp nuĭh Hợp tác xã lŏ mir, nkra njêng n’hanh tăch rgâl Sáu Nhung, du hợp tác xã lŏ mir geh âk đah ăp ndơ cà phê ta nkuăl Đăk Hà, n’gor Kon Tum. Bah rnôk hợp tác xã ntrôl ntuh kơl, kơt dŏng ăp công nghê-kỹ thuật mhe tâm tuch tăm, nkra njêng, tăch ndơ lĕ hao săk rnglăy pah kan, dơi tâm rlong, săk rnglăy nkra njêng tăch rgâl. Yuh Ngô Thị Mai, nuĭh kan bah hợp tác xã Sáu Nhung nkoch:

Rnôk râng lăp hợp tác xã, geh nău ntuh kơl mpeh công nghệ rgâl mhe âk nkôp đah bah năp. Rnoh neh jay gâp dôl tŏ ntêm nkrem krih ta tơm, trong ƀư aơ ntêm nkrem dak, phân poh n’hanh soan pah kan. Mât chăm tĭng trong hữu cơ nsĭt tay mir tơm hun hao nâp nâl.

Tĭng wa Nguyễn Tri Sáu-Kruanh hội đồng quản trị hợp tác xã Sáu Nhung, hợp tác xã geh rlău 100 nuĭh đah dĭng lĕ rnoh neh tăm rlău 300 ha cà phê. Nău kơt dŏng rgâl mrô mô knŭng mkra nău mât uănh doanh nghiệp, sŏk nău nsing nơm bah nuĭh dŏng, ma hôm nsĭt tay âk nău geh êng kơt dơi gĭt tât đah âk rơh kơn nuĭh, ăp năm nsĭt geh tăch ndơ ta mạng hao mro rlău 10%, lơn lah ndơ cà phê mbli. Du nău geh têh êng lah kơt dŏng mrô lĕ kơl nău mât prăk sam ƀŭt rhăch nău ngăch dơh, dơi joi, hŭch oi sam ƀŭt sam tra. Wa Nguyễn Tri Sáu lah:

Mpôl hên mĭn mro ndơ̆ ndơ bah hợp tác xã tĭnh trong nchrŏng bôk năp lah ƀư uĕh kah ndơ hăn ngai. Mpôl hên uănh tât ăp trong nkoch trêng mpla nsơ bah ăp trong gay nuĭh rwăt gĭt ăp ndơ uĕh kah. 2 tay lah ăp ndơ aƀaơ mpôl hên lĕ nkra njêng luh cà phê môi ngêt dâl, cà phê rlăi, grăp trăm.

Wa Nguyễn Lâm Cảnh, Kruanh Liên minh Hợp tác xã n’gor Kon Tum an gĭt, rgâl mrô lah trong hăn khlay bah nău hun hao, wăng sa nsum mô êng. Yơn lah, aƀaơ rnoh ăp hợp tác xã ta n’gor kơt dŏng công nghệ an nkra njêng, ƀĭt joet hôm e đêt n’hanh jêt chrai. Wa Nguyễn Lâm cảnh nkoch:

Gay ƀư uĕh nău aơ ri Ndrel tâm rgop đah ăp nău kan an ăp hợp tác xã râng ăp rgum tăch ndơ ntrŭt ngăch tăch rgâl, bah nĕ dơi tâm boh đah ăp hợp tác xã đah ăp doanh nghiệp gay tăch ndơ. Tal 2 lah ntop kơl an ăp hợp tác xã n’hao uĕh ndoh ndơ, bah nĕ jêng geh ăp ndơ đăp mpăn tâm di tĭng nău đă bah ntŭk tăch gay n’hao khlay bah ndoh ndơ bah nkual wăng sa nsum.

Gay n’hao dơi rgâl mrô bah ăp hợp tác xã, tâm năm tât, Liên minh Hợp tác xã n’gor mbra n’hao nău wât, nău blău an cán bộ mât uănh hợp tác xã mpeh nău geh bah ăp nău kơt dŏng công nghệ mrô, ƀư hăn uănh ăp hợp tác xã lĕ dŏng công nghệ mrô, bah nĕ nti nsơm, mbơh ƀư lam hvi ta n’gor.