Ntoh lư bah nău mô tŏng neh mbuh lah nău nchrăp ƀư trong mper dak lêng Vạn Ninh-Ninh Hòa jong nklăp 25 km, dĭng lĕ rnoh ntuh kơl rlău 2.000 rmen prăk. Nău nchrăp ƀư aơ ŭch nklăp 1,3 rkeh mét khối neh mbuh, yơn yor mô tŏng ndơ an jêng ngăch ƀư mhe geh nklăp 30%. Wa Trần Minh Chiến, Kruanh Ban Mât uănh Nkual wăng sa n’hanh ăp Nkual công nghiệp n’gor Khánh Hòa lo rwê.

Trong mper dak lêng aƀaơ ƀư jêr jŏt yor mô tŏng neh mbuh. Mô tŏng neh mbuh mbra khuch tât an prăk ntuh kơl nsum. Êp tât, ăp nkual Công nghiệp mbơh ƀư ndâk nkra ntung trong wăk kol đŏng. Bah aƀaơ, nuĭh ntuh kơl dŭt rwê yor mô geh neh mbuh, rnôk kuih mbuh tâm trôm dôl mô tŏng dŭt âk neh mbuh.

Tĭng N’gâng kan Tuch tăm mât rong n’hanh ntŭk ntô gŭ âm n’gor Khánh Hòa, ăp nău nchrăp ƀư ta n’gor Khánh Hòa dôl ŭch nklăp 6,3 rkeh mét khối neh n’hanh 350.000 mét khối lŭ. Gay mkra nău mô tŏng ndơ, ăp nuĭh tơm ntuh kơl dôl rdêng neh lŭ rmeh bah rnôk rdâk ƀư ăp nău nchrăp ƀư ntung trong êng. Aƀaơ dĭng lĕ rnoh ndơ rmeh ta ăp ndrĭch nklăp 3,3 rkeh mét khối. Wa Phạm Văn Hòa, Groi Giám đốc Ban Mât uănh ăp nău nchrăp ƀư Lŏ mir n’hanh ntung trong n’gor Khánh Hòa an gĭt, nău rdêng lah dŭt khlay.

Nău aơ mbra geh âk nău dơh yor nchrăp lor geh ndoh ndơ bah nău nchrăp ƀư, n’hŭch geh ndŏk nja. Yor kơt nău nchrăp ƀư Khánh Hòa-Buôn Ma Thuột dŭt jêr jŏt yor mô geh ntŭk nkhŭt. Rdêng an nău nchrăp ƀư êng mbra n’hŭch geh dŭt âk prăk ntuh kơl an lĕ 2 nău nchrăp ƀư.

Nu nău mpêt khar lŭ neh ta Khánh Hòa ntoh bah nău ŭch hao âk tâm rnôk ntŭk tăch ta ntŭk hôm e đêt, samƀŭt pă an sŏk joi neh lŭ n’hanh n’hao âk ăp ntu lŭ hôm e roh âk nar. Gay mkra tât dŭt, bah meng nău rdêng lŭ neh, n’gor Khánh Hòa dôl kơp uănh ăp nkual tŏng an sŏk joi, uănh trong mkra mât uănh ndoh ndơ khoáng sản lăp nkual dăp rgum n’gor. Ndrel đah nĕ, uănh mĭn tay uănh an du đêt nkual mô geh tâm rlong ndranh dơi uănh joi neh lŭ gay pă an ndơ ƀư ăp ntil ndơ ƀư, nău nchrăp ƀư khlay. Wa Lê Huyền, Groi Kruanh UBND n’gor Khánh Hòa đă ăp nuĭh tơm ntuh kơl, ntŭk kan mbơh ntĭm an nchrăp dâl bah nău nchrăp ndâk ƀư, uănh na nê̆ ntŭk tăch lŭ neh gay ndâk ƀư trong nchrăp tâm di, dêr an geh wăk kol tâm rnôk mbơh ƀư:

Ăp Ban mât uănh nău nchrăp ƀư an nchrăp trong mkra geh nkô̆ nău: Nău nchrăp ƀư bah nơm ŭch moh ntil ndơ dŏng? rnoh khlay ndâk âk? dêr nău moh ndơ ri dơi lah, ôp moh ntŭk n’hanh ndâng âk mô dơi ơh. Lah kơt mô dơi lah moh ntŭk ri mô gĭt nkô̆ nău gay ndâk ƀư nchroh trok ndơ̆ an ntŭk ƀư, yor nklăp 3km mô lah 5 km mbra êng êng. Jêng tât nău ndal an nău kan Tuch tăm mât rong-Ntŭk ntô gŭ âm tâm rnôk joi ntŭk, dăn đă, ndơ̆ an dăp rgum.