Ta rơh mâp, 2 ding uănh lah kan ndrel rnă njrăng nar lơ ƀư tơm khlay tâm boh 2 dak n’hanh lah rjăp nău ƀư lơn tay tâm rgop đah ăp ngih pah kan rnă njrăng, ƀư tĭng pháp luật n’hanh nchrŏng trong nău kơl. Tĭng nkô̆ nău tâm boh Kan ndrel têh lĕ rngôch Việt Nam-Ấn Độ, Tổng Bí thư, Kruanh dak Tô Lâm n’hanh Mbơh ntĭm Rnă njrăng Ngih dak Ấn Độ Ajit Doval lah rjăp ngăn nău ŭch tâm rgop săk rnglăy tâm njrăng n’gang rŭng răng, nău tih rlŏ rlău lam dak, mplư rlăm trực tuyến n’hanh ăp nău ntêt nkri mhe ntoh, tă bah nĕ rgop đăp mpăn rnă njrăng ngih dak n’hanh đăp mpăn nău rêh jêng bah ăp dak.

2 ding tâm ban ŭch ntrôl tâm rgop đah rnă njrăng n’hanh hun hao, pơk hvi kan ndrel tâm ăp ntil nău công nghệ trong kan kơt nău mĭn njêng mhe, rgâl mrô, rgâl mĭn ƀư mhe, ŭnh nar n’hanh ntĭm nti nuĭh kan uĕh blău. Mpeh ăp nău nkual n’hanh lam ntŭr neh, 2 ding tâm ban ŭch mpeh nău mât đăp mpăn, rnă njrăng, n’hanh dah rŏng trong dak lêng, trong ndeh păr; mkra nău tâm pit đah trong đăp mpăn tĭng luật pháp lam ntŭr neh, lơn lah Công ước Liên hợp quốc mpeh Luật dak lêng 1982 (UNCLOS 1982).

Ndrel tâm rơh khâl Gưl ngih dak ta Ấn Độ, măng 5/5, Tổng Bí thư, Kruanh dak Tô Lâm lĕ tât khâl n’hanh ƀư tơm nar mâp cán bộ nuĭh kan Đại sứ quán n’hanh âk nsum mpôl nuĭh Việt Nam ta Ấn Độ.