Tâm mông nar răm m’ak bah Tết Trung thu, Groi Kruanh dak Võ Thị Ánh Xuân ndrel mpôl pah kan n’hanh kruanh n’gor Dak lak lĕ râng ăp nău ƀư: hăn uănh nsong, ƀư ngăn ăp nău pâl way ơm, ƀư lồng đèn, sŏk ŭnh jrêng, uănh njroh lân n’hanh uănh ăp nău njroh mprơ ta măng rgum bŏng khay. Di rơh aơ, Groi Kruanh dak Võ Thị Ánh Xuân lĕ an 270 nklâm prăk kơl hăn nti, 120 bôk ndeh wah jâng an kon hŏk jêr jŏt, 1 mlâm jay an kon se kon đơi n’hanh 1500 nklâm ndơ dĭng lĕ khlay rlău 1 rmen prăk. Oh Nguyễn Quách Tuệ Minh, ngoăy tâm âk kon hŏk dơi sŏk ndơ an gĭt:

 Kon dŭt răm yor trung thu kon dơi an ndeh wah jâng, nău nĕ kơl kon hăn nti dơh lơn. Kon ton mbra nti gĭt gay mô nchlơi nuih n’hâm ăp kônh yơn.

Groi Kruanh dak Võ Thị Ánh Xuân rnê ăp nău nsrôih bah n’gor Dak Lak lah nsum n’hanh nkuăl Ea Hleo lah êng tâm ăp năm bah năp lĕ an nău uănh mĭn tât ăp druh ndăm, kon se rchong. Nkre, Groi Kruanh dak mpŏng, năm tât, ăp ngih pah kan, ntŭk kan đah ăp nău ƀư na nê̆, ngăn ngên rgŏ jă nău lăp bah lĕ trong chính trị, nsum  mpôl doanh nghiệp n’hanh lĕ kon nuĭh mât uănh, ngăch ntrŭt nsôr, kơl kon se, kon hŏk geh nău rêh jêr jŏt n’hanh uănh aơ lah nău kan khlay, jŏ jong.

Lăp ndrel đah mông nar trung thu ta lam dak, ăp nar aơ, âk rmôt kan, nsum mpôl ta Dak Lak nsrôih rgŏ jă nuĭh gay ƀư ăp nău kan răm rlưn, an ndơ an kon se ta ăp ƀon lan.

Jâng gung bah năp jay ngih buôn Trăp, xă Ea Hđing, nkuăl Cư M’gar, n’gor Dak Lak jêng n’gŭm răm, Ăp oh kon se tâm ƀon geh ăp yuh nô đoàn viên druh ndăm ta Nkuăl đoàn n’hanh ăp nuĭh ntop kơl tât ƀư bôk nău kan Vầng trăng yêu thương đah dŭt âk nău ƀư pâl rlưn, an ndơ. Djôt ƀănh n’hanh ŭnh đèn mhe dơn jêh rnôk râng pâl rlưn, oh H Trúc Êban rhơn nkoch:

Nar aơ kon dŭt răm rnôk dơi tât ta aơ n’hanh ƀư trung thu an ăp mon kon se tâm ƀon ta rơh aơ. Năm tât mpŏng yuh nô tât n’hanh ƀư trung thu kơt aơ tay. Nău ƀư pâl rlưn kơt aơ dŭt răm.

Wa Y Tứ Niê, Kruanh buôn Trăp an gĭt lĕ geh 100 nklâm ndơ dơi an ăp mon kon se tâm ƀon ta rơh aơ. Âk năm bah năp, đah nău ntop kơl bah ăp nsum mpôl n’hanh ăp ntŭk kan ntop kơl, tâm rơh trung thu mô lah tết kon se, ăp mon dơi râng ăp nău ƀư pâl rlưn, gŭ âm răm nsum. Tâm ăp bôk nău kan, ăp mpôl tâm rgop ƀư ăp nău kan nkre răm rlưn nkre geh nău ntĭm nti geh tât mât uănh săk nơm, răk rao săk jăn, mât njrăng ntŭk ntô gŭ âm, nkra njêng tay ntŭk nja.

Tâm âk năm dăch aơ dơi uănh mĭn bah n’gâng kan ƀon lan kơt ăp nuĭh lŏng bôk tôr ri buôn Trăp lĕ dơi gĭt âk bôk nău kan an ndơ bah ăp doanh nghiệp kơt ăp nsum mpôl. Tă bah âk bôk nău kan kơt aơ ri kơl kônh wa dŭt đăp mpăn đah nău ntrŭnh, nău kơl bah Đảng, đăp mpăn pah kan jan sa. Đah ăp oh kon se ri ăp mon dŭt rhơn n’hanh răm n’hanh dơi dơn ăp ndơ dŭt geh nkô̆.

 Ta xă Cư Kbang, nkuăl n’har bri Ea Sup, bôk nău kan “Bŏng khay n’har bri-Trung thu sĭt ƀon” dơi ăp ntŭk kan lŏng bôk tôr ƀư đah dŭt âk nău geh nkô̆. Mô knŭng dơi răm m’ak, ăp oh kon se hôm dơi tâm rgop nkoch trêng đah mât njrăng ntŭk ntô n’hanh ntĭm nti drăp ndơ văn hoá đah âk bôk nău Rveh tâm nău rêh bah nuĭh Bunong. Kơt ta nkuăl jru ngai Krông Bông, âk mpôl lŏng bôk tôr ta nkual ƀon têh Hồ Chí Minh tâm rgop đah Hội chữ thập đỏ ƀư bôk nău kan trung thu tâm rgop but uănh ji, pă dak si, an ndơ an nuĭh ach o n’hanh kon se ta ntŭk. Tă bah ăp bôk nău kan, hang rbăn nklâm ndơ lĕ dơi an ăp oh jêt, kơl ăp oh dơi saơ mông nar trung thu n’gŭr răm. Ngăn lah đah ăp kon se jêt ta nkual jru ngai, ăp nklâm ndơ jêt yơn geh nkô̆ nău nuih n’hâm dŭt têh. Nô Y Chuôr Buôn Krông, Bí thư đoàn ngih sam ƀŭt Đại học Tây Nguyên lah:

Mpŏng ŭch njuăl tât ăp oh kon se jêt geh âk nar răm trung thu gay ăp oh geh tay ntŭk pâl an hun hao tay kơt ntop kơl tay nău nti nsơm. Bôl tât đah bôk nău kan ri mô geh âk ndơ khlay yơn nsrôih dŭt n’hâm gay tâm pă đah ăp băl kon se ta ƀon lan, ngăn lah ăp băl geh nău rêh jêr jŏ.

Ăp nklâm ndơ ƀănh kĕo, ndơ dŏng nti mô lah ăp nklâm prăk kơl hăn nti bôl jêt yơn geh nkô̆ khlay têh đah nuih n’hâm, lơ jêng nău khlay đah ăp kon se jêt ta ăp ntŭk jêr jŏt. Mô knŭng lah nău ƀư kơl ăp oh geh tay ntŭk pâl, ăp bôk nău kan trung thu tât đah ăp ƀon lan lah di an ăp oh saơ mông nar răm m’ak, n’gŭr răm bah rơh tết trung thu way ơm bah rnoi nuĭh.