Mih têh na nao ta lam hvi yor khuch bah phŭt mrô 6, ta năp nău geh dak bŭk, dak rchoh, pĭch rlâm neh, n’gor Kon Tum lĕ mbơh ƀư trong kan rdâng đah trôk nar lơh. Yor khuch bah phŭt mrô 6, bah kêng măng 26/10, ta n’gor Kon Tum geh mih jêt, mih têh ta lam hvi, tâm nĕ ta nkuăl Đăk Glei rnoh mih têh ngăn bah 80-120mm. Ăp nkuăl Ia H’Drai, Kon Plông, Đăk Tô, Kon Rẫy, Ngọc Hồi, Sa Thầy n’hanh nkual ƀon têh Kon Tum rnoh mih âk bah 50-81 mm.

Mbơh ƀư trong kan rdâng đah phŭt mrô 6, UBND n’gor Kon Tum ntĭm rđău 10 nkuăl, nkual ƀon têh lơn lah 3 nkuăl mpeh Đông, Đông Bắc bah n’gor, geh Đăk Glei, Tu Mơ Rông n’hanh Kon Plông ƀư tĭng rjăp ntĭm rđău bah Chính phủ, N’gâng kan Trung ương n’hanh bah n’gor mpeh n’hao trong kan njrăng n’gang trôk nar lơh. Uănh nđôi rjăp tay nu nău mih dak lip, ƀư tĭng “4 ta ntŭk”, nchrăp rdâng, mkra ăp nu nău trôk nar lơh, nău mâp n’hanh joi kơl nău rmanh; mbơh ƀư ăp trong mât njrăng, đăp mpăn đah nuĭh, drăp ndơ bah nuĭh ƀon lan, đăp mpăn rnă njrăng n’hanh nkual trơn bah nuĭh ƀon lan.