Tă khuch bah sial n’hach nklang dak lêng, ntơm bah ôi ntri (25/9) ta n’gor Kon Tum hŏ geh mih. Rdâng lơh đah mih n’hach nchroh mbra tât jêng mih têh tâm ăp nar tât, n’gâng kan ăp gưl n’gor Kon Tum lor nchrăp an ƀư ăp trong njrăng, n’gang mih dak bŭk n’hanh pĭch rlâm neh.

Ta ăp nkuâl mbra geh tât khuch bah sial n’hach lah: Kon Plông, Tu Mơ Rông n’hanh Đăk Glei, UBND n’gor Kon Tum rđău đă n’gâng kan ăp nkuâl ndăn ngăch an ƀư pah kan njrăng, n’gang dak bŭk n’hanh pĭch rlâm neh. Đah nkual ƀon lan gŭ meng dak me, dak diăng, bri rđŭng dêh geh ma nău dak bŭk, pĭch rlâm neh nchrăp trong rdâng lơh lor ntrơn du nuĭh ƀon lan nkhêp geh nău tât. Nchrăp mpôl kan hăn ôp uănh, ntĭm nti ntung trong ta ăp ntŭk ler băm, nkual ndâp jru, dak hoch thăng. Tâm pă mpôl kan, ndeh rklư gay nkra bah, đăp mpăn hăn ntung trong mbluh soih ta ăp n’glah trong me rnôk geh nău tât mih têh./.