Ôi 7/4, nkhêp geh hăn sĭt mpoh nhang Giỗ tổ Hùng Vương, Kruanh dak Lương Cường hŏ tât khâl n’hanh rgŏ jă cán bộ, tahen công an Phú Thọ ta Ntŭk rgum nău lư rđău đă Công an n’gor Phú Thọ ƀư ta Nkual têl ơm yău Đền Hùng.

 Kruanh dak Lương Cường njrăng đă, Giỗ Tổ Hùng Vương n’hanh Pơh Văn hóa-Pâl nđaih me neh ndru yău năm aơ hŏ ƀư ntơm bah nar 29/3 tât 7/4 jêng bol hŏ ƀư jăp pah kan mât đăp mpăn rnă njrăng, đăp mpăn hăn ntung trong ăp nar mhe aơ yơn nar kêng dŭt bah lễ hội, Công an n’gor Phú Thọ nha hôm kan nsum đah ăp mpôl kan rgum pah kan đah nuih n’hâm dŭt âk, lor nchrăp, đăp mpăn rnă njrăng, đăp mpăn  lam  lĕ rngôch đah năch n’hanh mô an geh  ăp nău tât yô̆ nđach; nkre ntik n’hao nău way ơm tâm rnglăp, tĭng ƀư geh nău dơi ăp nău dơn kan ma kruanh rđău kan Bộ công an, Kruanh n’gor Phú Thọ jao an.