Nar 2/2, Ủy ban MTTQ Việt Nam n’gor Dak Lak ƀư Tâm nchră tâm ban ŭch tâl bar, tâm ban ŭch nchih săk bôk năp 22 nuĭh dơi mbơh dâk tâm rlong đại biểu Quốc hội khóa XVI, năm kan 2026–2031. Bah năp nê, tâm nchră tâm ban ŭch bôk năp dơn ngoăy rnoh âk đại biểu Quốc hội dơi sơch ta n’gor lah 15 nuĭh, lĕ ma 6 đại biểu tă bah Trung ương mbơh n’hanh 9 đại biểu tă bah n’gor nkoch mbơh; lĕ rngôch rnoh âk nuĭh dơi nkoch mbơh dâk tâm rlong nchrăp 28 nuĭh. Nsing ta nău tâm pă, Ban Rnâng kan Ủy ban MTTQ Việt Nam n’gor hŏ njuăl siƀŭt mbơh tât 17 nhih pah kan, mpôl kan, đơn vị gay mbơh 22 nuĭh.

Tât 5h kêng măng nar 25/1/2026, Mặt trận Tổ quốc n’gor hŏ dơn tŏng hồ sơ tĭng quy định. Tâm nchră tâm ban ŭch lor bôk năm săk 22 nuĭh n’hanh tâm nchră njrăng uănh khlay sŏk nău rgop cử tri ta ntŭk gŭ, ntŭk pah kan đŏng. Lah ta rnôk tâm nchră, wa Cao Thị Hòa An, Ủy viên Trung ương Đảng, Groi Bí thư Rnâng kan Tỉnh ủy, Kruanh HĐND n’gor, Kruanh Ủy ban Bầu cử n’gor Dak Lak dăn đă Ban Rnâng kan Ủy ban MTTQ Việt Nam n’gor kan nsum tay lhăt đah ăp nhih pah kan geh tât, an ƀư di rêng ăp njuat tâm ban ŭch tay, đăp mpăn geh nău tâm ban, di rnoh ngăch n’hanh quy định bah pháp luật.