Măng 2/2 ta Hà Nội, Tổng Bí thư Tô Lâm, Bí thư Quân ủy Trung ương râng n’glôch jêh, nkhôm an rơh tâm rlong báo chí “Nâp jâng chuat bah nâm cờ Đảng” nchih mpeh Đảng rsang ang, Wa Hồ têh khlay.

Rgŏ jă ntơm bah 5/2/2025 nkhêp nkah ndray 95 năm Nar njêng Đảng, rơh tâm rlong jêng rơh sinh hoạt chính trị, nău mĭn jru hvi, njêng nuih n’hâm nsan tâm rlong lam rêh jêng kon nuĭh n’hanh Mpôl tahen. Mpôl tơm ƀư dơn rlău 8.000 nău nchih mpeh 5 ntil nău: chính luận, ôp ngăn, uănh năl, rup báo chí n’hanh báo chí pơk ƀoh ma âk ntil ndơ; âk nău nchih săk tam, hôr jru nău rlăch ndăng.

 Hội đồng sơ khảo hŏ sơch lăp tâm rơh tâm rlong n’glĕ dŭt 116 nău nchih n’hanh nkhôm an 66 nuĭh tơm nchih, rmôt tơm nchih dŭt uĕh blău, lah: 5 giải A, 11 giải B, 25 giải C n’hanh 25 giải Khuyến khích; nkhôm an 10 mpôl geh nău dơi dŭt ngăch prăl tâm nău leo ƀư n’hanh rgŏ jă rơh tâm rlong. Ta rơh lễ, ăp nuĭh tơm nchih, rmôt tơm nchih geh ndơ nkhôm rnê hŏ dơi mpư n’hao. Tổng Bí thư Tô Lâm n’hanh Đại tướng Phan Văn Giang, Bộ trưởng Bộ Quốc phòng ndơ̆ nkhôm giải A an 5 nău nchih dŭt uĕh blău tâm rơh tâm rlong.