Nkah ndray 70 năm nar Nai dak si Việt Nam, ôi 26/2, ta Nhih pah kan kruanh dak, Kruanh dak Lương Cường mâp măt mpôl ntơh măt ntoh lư n’gâng kan dak si n’hanh ntăm săk ntơ “Nai dak si ƀon  lan” năm 2024 an 46 nuĭh.

Ta rơh mâp măt, Kruanh dak lah rjăp ăp nai dak si lah ăp nuĭh “me mbleh” ngăn, mô dơn geh nuih n’hâm rŏng nuĭh, nuih n’hâm mbleh ma hôm geh nău mĭn rôih dăng, nău nđơr mô plơ̆ rŭch, ât rdâng đah nău krit jêr jôn wên, ƀư wat jêh ngăch prăl nău kan đŏng, rgop khlay tâm n’gâng kan rlăch ndăng rklaih luh rnoi nuĭh, dơn ngoăy neh dak ntơm nơh đŏng, tâm ban kơt ăp rơh rdâk njêng n’hanh mât njrăng neh dak Việt Nam dêh rŏng bah he aƀaơ đŏng. Tâm rơh hun hao mhe- rơh hun hao lhung jong săk, hun hao ndrŏng dăng n’hanh rơ̆ jêng uĕh bah rnoi nuĭh. Kruanh dak dăn đă ăp gưl, ăp n’gâng kan, lơn lah n’gâng kan dak si ân rgum hun  hao tay lam trong kan dak lam lam ƀon lan; đăp mpăn ăp nuĭh ƀon  lan, bol ma ta nkual ƀon têh mô lah ta thôn ƀon, mô lah nkual jru, nkual ngai, n’har bri mô lah gôl dak dơi tât ăp rhŏ dŏng dak si tơm đŏng. Tĭng kruanh dak, dak si tâm dâng dơi rdâk nâp tay, ntuh kơl ndơ năp dŏng têh blău mhe n’hanh n’hao săk blău tơm nuĭh kan gay jêng bôk tơm tâm hun hao mât chăm n’hâm suan lam ƀon lan ta ntŭk.