Tâm nar pah kan lor bôk năp bah rơh hop tâl 8, Quốc hội khóa 15, kêng măng ntri (21/10), Quốc hội hŏ ƀư rơh sơch Kruanh dak Cộng hòa xã hội chủ nghĩa Việt Nam năm kan 2021-2026. Kêng dŭt, Ủy viên Bộ Chính trị, Rnâng kan Ban Bí thư Lương Cường hŏ dơi Quốc hội sơch ƀư Kruanh dak Cộng hòa xã hội chủ nghĩa Việt Nam năm kan 2021-2026. Nghị quyết mpeh nău sơch wa Lương Cường ƀư Kruanh dak hŏ dơi ăp đại biểu Quốc hội n’hơr ti ŭch đah lơn âk đại biểu râng n’hơr ti ŭch. Ta nâm cờ gŭr mănh êr, Kruanh dak Cộng hòa XHCN Việt Nam năm kan 2021-2026 Lương Cường ton dơn nău kan: “Du nuih n’hâm du trong tĭng neh dak, đah ƀon lan, đah Hiến pháp dak  CHXHCN Việt Nam; nsrôih ƀư lôch jêh uĕh nău dơn kan dơi Đảng, Ngih dak n’hanh Ƀon lan jao an”. 

Wa Lương Cường deh nar 15/8/1957; Ƀon tơm: Xã Dữu Lâu, nkual ƀon têh Việt Trì, n’gor Phú Thọ. Kruanh dak Lương Cường tă ƀư ăp nău kan: Chính ủy Quân đoàn 2; Chính ủy Quân khu 3. Khay 1/2016, ta Đại hội đại biểu lam dak tâl XII bah Đảng, wa Lương Cường dơi sơch lăp tâm Ban Chấp hành Trung ương Đảng. Tâm nchră lor bôk năp Ban Chấp hành Trung ương Đảng, hŏ sơch wa Lương Cường lăp tâm Ban Bí thư Trung ương Đảng khóa XII. Khay 4/2016, wa Lương Cường dơi Bộ Chính trị n’glêh an đă ƀư Chủ nhiệm Tổng cục Chính trị, Tahen ƀon lan Việt Nam. Khay 01/2019, wa  Lương Cường dơi ntăm n’hao grat Đại tướng. Ta Đại hội đại biểu lam dak tâl XIII bah Đảng, wa Lương Cường dơi sơch lăp tâm Ban Chấp hành Trung ương. Ta tâm nchră bôk năp Ban Chấp hành Trung ương Đảng, wa Lương Cường dơi sơch lăp tâm  Bộ Chính trị khóa XIII. Khay 5/2024, Bộ Chính trị hŏ n’glêh an đă Đại tướng Lương Cường, Ủy viên Bộ Chính trị, Chủ nhiệm Tổng cục Chính trị Tahen ƀon lan Việt Nam râng Ban Bí thư n’hanh ƀư Rnâng kan Ban Bí thư.