Kêng măng 25/10, ta ntŭk kan Kruanh dak, Kruanh dak Lương Cường vơt Groi Kruanh Quân uỷ Trung ương Trung Quốc, Thượng Tướng Trương Hựu Hiệp dôl geh rơh khâl ndrel pah kan ta Việt Nam. Kruanh dak Lương Cường rnê prêh nau tă geh bah rơh tâm nchră đah Kruanh n’gâng kan Việt Nam, Groi Bí thư Quân uỷ Trung ương Phan Văn Giang ndrel Groi Kruanh Quân uỷ Trung ương Trung Quốc Trương Hựu Hiệp, rhơn rnôk ndơn saơ nau tâm boh neh dak bar ding lŏ geh hun hapo mhe, săk tam, tâm di đah nau tă ký ton ndrel nau nchrăp đah Rđau kan gưl prêh bar Đảng, bar dak.

Kruanh dak đă rơh tât Quân uỷ Trung ương, N’gâng kan neh dak lŏ ntrŭt dăng, ƀư jru lơn tay nau tâm boh kan nsum neh dak bar ding bah nau tâm nchră bah rmôt kan ăp gưl, ngăn lah rmôt kan gưl prêh; mât nau săk tam bah nau kan tâm boh dôl geh. Lah rjăp năm 2025 lah năm Việt Nam nkah 80 năm ndâk neh dak ndrel 70 năm ndâk tâm boh nchră nau Việt Nam-Trung Quốc, đồng chí Trương Hựu Hiệp lah rjăp bar ding lŏ ƀư nâp đah ntrong ma rđau kan gưl prêh bar Đảng, bar dak hŏ kơp dơnl nkre n’hao tâm boh kan nsum tâm ăp nau kan, gay ndâk nsum mpôl tâm nkoch mbơh nau geh nau khlay./.