Ta Nkual ƀon têh Đồng Xoài, n’gor Bình Phước, ƀư bôk nău Măng rgum bŏng khay 2023 “Lồng đèn mpoh ang nău ŭch”. Kruanh dak Võ Văn Thưởng râng n’hanh ntoh ngơi ta bôk nău ƀư. Bôk nău ƀư dơi pơk trực tuyến ta ăp trang cộng đồng bah Trung ương Đoàn, Hội đồng Đội Trung ương, kơt dŏng “Druh ndăm Việt Nam” n’hanh dơi ƀoh trực tuyến đah 14 ntŭk ta ăp n’gor, nkual ƀon têh lah Hà Giang, Hà Nội, Lào Cai, Ninh Bình, Hải Phòng, Quảng Ninh, Hà Tĩnh, Dak Lak, Lâm Đồng, Đồng Nai, Bình Dương, Nkual ƀon têh Hồ Chí Minh, Bến Tre, Kiên Giang. Êng ta ntŭk ƀoh tơm Bình Phước geh 1.000 oh kon se râng Măng rgum.

Dơi ƀư âk bah nar 19/9 tât 29/9 năm aơ, Bôk nău ƀư trung thu an kon se “Lồng đèn mpoh ang nău ŭch” lĕ n’hanh dôl dơi Đoàn druh ndăm, Hội đồng đội ăp gưl, ăp ntŭk Đội ƀư đah âk nău ƀư uĕh đah rlău 5 rkeh mlâm lồng đèn n’hanh nklâm ndơ trung thu an ăp oh kon se lam dak. Aơ lah ndơ măng Trung thu an ăp mon kon se geh nău rêh jêr jŏt. Ntoh ngơi ta Măng rgum, Kruanh dak Võ Văn Thưởng njuăl tât ăp oh kon se, kon se rchong lam dak nău ôp khâl đêp rmên n’hanh mpŏng Trung ương Đoàn TNCS Hồ Chí Minh n’hanh ăp ngih pah kan, rmôt kan n’hanh lam kon nuĭh ndrel ty gay “ăp năm ăp mon kon se dơi răm rlưn, mĭn ƀư mhe, tâm pă nău răm”.