Nkhêp geh Tết Trung thu, Kruanh dak Võ Văn Thưởng mhe geh Siƀŭt njuăl ăp druh ndăm rchong, kon se jê̆ lam dak. Tâm siƀŭt njuăl geh nchih: “Trung thu lah Tết bah ăp kon se. Ăp rnôk tât Trung thu, ăp mon său hôm dơi ndrel pâl rlưn tay, ndrel u che, me bơ̆ njôm wăr nsum bah meng mâm cỗ trông trăng, ndrel rngân năl jru ăp rnoh khlay bah nău tâm rŏng rnăk wâl, ăp nău răm mbak kloh rsang bah kon se.

Trung thu lah Tết bah nău tâm rŏng n’hanh tâm pă, lah rnôk gay bu kuâng ranh nkah săk nơm ân ŭanh khlay lơn tât kon se ma nău tâm rŏng, nău  dơn kan n’hanh ăp nău dâk kan ngăn ngăn. Lơn lah ŭanh khlay tât ăp mon său geh nău rêh jêr jŏt, ăp mon său kon prôi kon đơi, ăp mon său ta nkual jru, nkual ngai, nkual n’har bri, gôl dak… gay ăp kon se dơi wơt Tết Trung thu ăp tŏng lam lĕ rngôch, dơi kơt nti, blău ƀư mhe n’hanh pâl rlưn răm mƀak tâm nău dêh rŏng bah rnăk wâl, nsum mpôl lam ƀon lan. Gâp dŭt rngot rhơn n’hanh n’hao êng săk rnôk tâm bah ri aơ, ăp mon său geh âk nău rgâl, ƀư geh âk nău kan uĕh, kah gĭt sĭt n’glĭng u che, me bơ̆, gĭt kơl n’hanh tâm ryơk đah ăp nuĭh mô geh nău lap rlău he. Gâp ŭch rŏng ăp mon său way mât mbro ăp nău ŭch rŏng uĕh, dêh rŏng rnăk wâl, geh nău si ƀăp, gĭt nău tâm rnglăp, tâm kơl nsum, tâm rlong ƀư nău kan uĕh, di lah kon mbleh, nti blău, mon jăp wa Hồ!”

Ôi lơ 27/9, groi kruanh dak, kruanh Hội đồng ntŭk tâm rgop kan kơl an oh kon se Việt Nam Võ Thị Ánh Xuân lĕ tât khâl, pă ndơ an ăp oh kon se ta ntŭk kan mât kơl nău rêh jêng ta n’gor Dak Lak.

Ta aơ, groi kruanh dak Võ Thị Ánh Xuân lĕ tât ôp khâl, pă ndơ an ăp ntil ndơ lah banh trung thu tât ăp oh kon se n’hanh pă an 50 rkeh prăk tata ntŭk kan mât kơl nău rêh jêng ta n’gor Dak Lak gay ma ntop kơl an ăp oh geh nău rêh jêr jŏt mô lap dôl rêh n’hanh pah kan ta ntŭk kan. Groi kruanh dak Võ Thị Ánh Xuân rnê n’hanh n’hao nuih âk nău geh lĕ dơi geh bâh cán bộ, mpôl pah kan bâh ntŭk kan mât kơl nău rêh jêng ta n’gor Dak Lak tâm ba năp nơh. Ăp nău kan bâh ntŭk kan lĕ ntop lah na nê̆ ăp nău ntrŭnh tâm di mpeh nău rêh jêng bâh Đảng,  ngih dak tâm nău mât chăm, mât rong nuih ranh nuĭh gŭ êng mô geh nsing nơm, oh kon se kon đơi,  geh nău ji geh nklơi êng.