Nkhêp di nkah gĭt Nar Doanh nhân Việt Nam, 13/10, rƀŏng tât nkah gĭt 9 năm nar ndâk njêng Hiệp hội bu ur doanh nhân Việt Nam 19/10 n’hanh Nar Bu ur Việt Nam 20/10, kêng măng 5/10, ta Ntŭk kruanh dak, Kruanh dak Võ Văn Thưởng mâp măt Mpôl 90 bu ur doanh nhân ntoh lư bah Hiệp hội bu ur doanh nhân Việt Nam.

Lah rjăp, Đảng, Ngih dak uănh khlay, nta an hun hao têh dăng bah rmôt doanh nhân Việt Nam, tâm nĕ geh doanh nhân, Kruanh dak mpŏng Hiệp hội bu ur doanh nhân Việt Nam, lah ntŭk mât rong, ntrŭt đă nău ŭch ƀư ndrŏng tâm di bah bu ur, bu ur doanh nhân Việt Nam; lơn lah rêng hvi nău ŭch têh dăng đah nău nsrôih hao, ntrŭt nsôr ăp băl mom ƀư ndrŏng tâm di.

Đah rnoh bu ur dak he geh 50% rnoh nuĭh n’hanh bơi 50% pah kan lah bu ur, Kruanh dak an lah, rnoh 8.000 bu ur doanh nhân râng Hiệp hội doanh nhân bu ur mô lah lĕ nău dơi bah bu ur doanh nghiệpViệt Nam. Yor nê, Kruanh dak mpŏng ŭch hiệp hội pơk hvi ta lam 63 n’gor, nkual ƀon têh. Kruanh dak Võ Văn Thưởng đă ăp bu ur doanh nhân rgop tay koh n’hŭch ăp sam ƀŭt hành chính âk ir, nta an ntŭk ntuh kơl tăch rgâl dơh lơn, rgop ndâk njêng ăp nău kơl hun hao neh dak.