Di rnôk râng tâm nchră gưl prêh tâm boh lam ntur neh “Trong doal ndrel trong me” tal 3, Kruanh dak Võ Văn Thưởng hŏ geh rơh tâm mâp ma Tổng thống Uzbekistan Shavkat Mizyoyez. Kruanh dak Võ Văn Thưởng lah rjăp, nau kan du ntil bah Việt Nam lah mro uănh khlay nau hun hao tâm boh vay ơm ndrel tâm boh âk nau kan đah ăp dak trung Á, tâm nê geh Uzbekistan, ŭch nau tâm boh Việt Nam-Uzbekistan hun hao rjăp lơn tay, tŏng dơi nau geh dơi bah nŭih ƀon lan 2 dak.

Tâm nau rnê prêh nau geh dơi tâm boh, Kruanh dak đă bar ding ntrŭt dăng tâm boh văng sa, tăch rgâl dôl geh nau dơi ndâk tâm rơh êp aơ, nkre ƀư rjăp lơn tay nau kan êng êng kơt ntĭm nti, tâm mbơh nau vay ơm, tâm n’ur ƀon lan, mĭn gay pơk hvi trong mpar sŏng nthoi ăp ntŭk tât bah bar dak. Kruanh dak Võ Văn Thưởng đă 2 ding ntrŭt dăng nau tâm nchră ăp gưl, ngăn lah gưl prêh, gay n’hao nau tâm rnơm chính trị ndrel nau tâm gĭt rbăng nsum, pơk hvi nau tâm boh bar ding tâm ăp nau kan ma bar ding geh nau dơi tâm ntop ân ndrăng nơm./.