Lŏ tâm rơh hăn kan ta Tuyên Quang, ôi 24/9, Kruanh dak Võ Văn Thưởng ndrel rmôt hăn kan hŏ tât mpoh kthup, leo nkao nkah Kruanh Hồ Chí Minh ta Lán Nà Nưa, tâm nkual nkah ơm khlay bah neh dak Tân Trào. Bah năp huêng khlay bah Kruanh Hồ Chí Minh, Kruanh dak Võ Văn Thưởng ndrel rmôt hăn nsum hŏ dŏng du mnĭt gay nhêp măt nkah tât Wa, tnoh nuih n’hâm nkah gĭt tât nau kan têh bah Wa, rđau kan blau, Nŭih nai ntĭm rđau bah cách mạng Việt Nam, lôch nau rêh kơl an rnoi mpôl, đăp mpăn neh dak, ân nau dah rŏng, đăp mpăn bah ƀon lan.

Lán Nà Nưa tâm bri Nà Nưa, ta Thôn tân Lập, xã Tân Trào, nkuăl Sơn Dương, ntŭk Wa Hồ tă gŭ, pah kan ntơm dŭt khay 5 tât lơ 22/8/1945 gay rđau nau ƀư ndâk lơh Khay 8 nsĭt n’gâng kan tâm lam dak, ân tât lơ 2/9/1945, Kruanh Hồ Chí Minh răk Bản Tuyên ngôn độc lập, deh jêng dak Việt Nam Dân chủ Cộng hoà. Jêh nê, Kruanh dak Võ Văn Thưởng ndrel rmôt hăn kan tât mpoh kthup ta Đình Tân Trào, lah ntŭk geh Quốc dân Đại hội, pơk bôk bah Quốc hội Việt Nam rnôk aơ./.