Nar nđaơ (17/10), Kruanh dak Võ Văn Thưởng n’hanh Mpôl đại biểu Gưl prêh Việt Nam lĕ tât Thủ đô Bắc Kinh, Trung Quốc, ntơm ăp nău ƀư bah bôk nău kan râng Rƀŭn nchră gưl prêh kan ndrel lam ntŭr neh “Vành đài n’hanh Con đường” rơh tal 3 bah nar 17 tât 20/10. Tĭng bôk nău kan, Kruanh dak Võ Văn Thưởng râng ntơm ƀư rƀŭn nchră gưl prêh kan ndrel lam ntŭr neh “Vành đài n’hanh Con đường” rơh tal 3 yor Tổng Bí thư, Kruanh dak Trung Quốc Tập Cận Bình ƀư tơm; Râng n’hanh ntoh ngơi ta rơh rƀŭn gưl prêh geh bôk nău:Wăng sa mrô-Nuih n’hâm mhe bah hao jêng n’hanh mbra geh âk rơh mâp ăp ding khlay đah kruanh ăp dak, ăp rmôt kan lam ntŭr neh ndrel râng rƀŭn rơh aơ.

Kruanh dak Võ Văn Thưởng mbra geh âk rơh mâp ăp ding đah kruanh Trung Quốc, khâl ntrong kan ntoh lư ndâk njêng thôn ƀon mhe bah nkual ƀon têh Bắc Kinh; wơt du đêt kruanh ăp tập đoàn bôk năp Trung Quốc. Mâp cán bộ, nuĭh kan Đại sứ quán Việt Nam n’hanh Tổng lãnh sự Việt Nam ta ăp nkual ƀon têh ta Trung Quốc.