Kêng măng 27/9, ta nkuăl ƀon têh Đồng Xoài, Kruanh dak Võ Văn Thưởng pah kan đah n’gor uỷ Bình Phước mpeh nau kan, nau tă geh dơi ƀư nau kan mât đăp mpăn neh dak, tâm nchră đah dak ba dih, rgâl tư pháp năm 2023. Kruanh dak đă Bình Phước lŏ ƀư rjăp ăp nau ntrŭnh bah Đảng mpeh neh dak, rnă njrăng, tâm nchră, ndrel ma nau kan hun hao văng sa, rêh jêng, ƀư ngăn ăp nau nchrăp, nau kan, ntrong kan tâm di gay mât nâp neh dak, nkuăl neh, rnă njrăng neh dak, đăp mpăn nau rêh jêng.

Kruanh dak lah rjăp, n’gor ân ƀư ueh nau ntrŭnh 27 mpeh nau ndâk ndrel ƀư jêh Ngih dak pháp quyền xã hội chủ nghĩa Việt Nam tâm dăch ma nau geh bah n’gor. Uănh khlay nau ƀư pháp luật ân rjăp, tâm ban, đăp mpăn ryơk Hiến pháp ndrel pháp luật. Ntrŭt dăng nau rgâl mhe tư pháp, đăp mpăn nau kan ngih phat dôih tĭng nau dơi rklaih, thẩm phán, hội thẩm mhal nau tih ân geh nâp ndrel kơt tĭng pháp luật. Rgum tâm nau n’hao nau rđau kan ndrel n’hâm tâm lơh bah gưl uỷ, ntŭk kan đảng, ndâk rmôt tahen kloh, nâp dăng./.