Ta rơh tâm mâp, kruanh dak Võ Văn Thưởng lah na nê̆ Việt Nam way uănh khlăy nău tâm boh kan Việt Nam- Lào lah drăp ndơ dŭt khlăy, lah nău tâm boh kan ueh, kan jăp, du nuih n’hâm ta nău tâm boh kan lam ntur neh. Bar hê nuĭh leo kan tâm ban ŭch geh mât tay an săk rnglăy ăp nău tâm nđur mpeh văn hóa, thể thao n’hanh pâl nđaih, ƀư tĭng ueh jăp bôk nău kan n’hao nău ueh dơi n’hanh săk rnglăy tâm kơl kan Việt Nam- Lào ta trong kan ntĭm nti n’hanh hun hao ueh rnoh kan lvang năm 2021-2030.

Tổng Bí thư, kruanh dak Thongloun Sisoulith an gĭt Lào dŭt uănh khlăy nău tâm boh kan đah Việt Nam, way uănh nău nsrôih gay ma bun dăp n’hanh ndơ̆ nău tâm boh tâm rnglăp têh kuăng, tâm rnglăp khlăy n’hanh tâm kơl lĕ rngôch Việt-Lào an geh hun hao tay nâp nâl, ăp nar lơ ma lăp jru tâm nău rêh, mpơl na nê̆ mbra nsrôih tâm rgop ntrôl nău tâm boh kan 2 Đảng, 2 dak. Tâm rơh aơ đŏng, kruanh dak Võ Văn Thưởng n’hanh mpôl kan gâl têh Việt Nam lĕ geh rơh tâm mâp cán bộ, nuĭh kan ăp ntŭk kan ndơn kan Việt Nam ta Trung Quốc.