Kêng măng nar 13/10, ta Nhih pah kan kruanh dak, Kruanh dak Võ Văn Thưởng wơt Đại sứ Nigeria, wa Hassan Adamu Mamani tât ntĭnh sĭt, lĕ năm pah kan ta Việt Nam. Kruanh dak  Võ Văn Thưởng rnê âk, Đại sứ hŏ rgop khlay tâm nău ntrŭt ntrôl tâm boh đah Việt Nam n’hanh Nigeria, mbah rhơn Nigeria hŏ geh ăp nău dơi wăng sa rêh jêng kon nuĭh khlay tâm bah ri aơ.

Mpeh tâm boh bar ding, Kruanh dak Võ Văn Thưởng rnê âk nău dơi geh tâm boh đah Nigeria n’hanh Việt Nam tâm bah ri aơ, lơn lah ăp nău kan tâm boh tâm trong hun hao wăng sa-  rêh jêng kon nuĭh. Lah rjăp Việt Nam tĭng ƀư du gung trong tâm boh dak bah dih nsrôih ndôr êng, yor ma nău đăp mpăn, tâm rnglăp, tâm boh n’hanh hun hao, âk ding, âk ntil trong tâm boh dak bah dih; lah băl, lah tâm boh nsing nơm n’hanh lah dak lăp kan nsum nsrôih uĕh, geh nău dơn kan nsum lam ntŭr neh, Kruanh dak an gĭt, Việt Nam ŭch rŏng hun hao lơn đŏng tâm boh đah Nigeria tâm ăp  trong kan. Bar ding ân n’hao dăng tâm mâp, tâm khâl gưl têh n’hanh ăp gưl; ntrŭt ntrôl lơn đŏng tâm boh đah ăp n’gâng kan, ăp n’gor; tâm rgâl tay, tâm boh đah ăp nkô̆ nău bah nkual n’hanh lam ntŭr neh./.