Ôi 25/9, Kruanh dak Võ Văn Thưởng hŏ wơt Kruanh Quốc hội N’gâng kan ƀon lan Cộng hoà Cuba Esteban Lazo Hernandez nkhêp geh râng Lễ nkah ndray 50 năm hăn khâl bah Kruanh Fidel Castro nkhêp geh hăn khâl n’hanh pah kan ta Việt Nam ntơm bah nar 24 tât 28/9.

Ta rơh wơt, Bar kruanh rđău kan tâm ban ŭch an lah, nău bar dak ndrel ƀư nkah ndray nar têh khlay kăl e 50 năm hăn khâl bah Kruanh Cuba Fidel Castro tât nkual Rklaih luh miền Nam Việt Nam lah gay mpơl nău uănh khlay ăp drăp ndơ ơm yău ntlơi an tay tă bah Kruanh Hồ Chí Minh, Kruanh Fidel n’hanh âk rơh kơn kruanh, ƀon lan bar dak hŏ an tay tâm boh Việt Nam -Cuba. Đảng, Ngih dak Việt Nam n’hanh Cuba mbra ntĭm nti ăp rơh kơn mom ndăm bar dak mât ndray bun dăp an nău tâm rnglăp oh nô tâm boh mha êng Việt Nam-Cuba. Nsing ta nău tâm boh oh nô mha êng Kruanh dak Võ Văn Thưởng dăn đă bar ding kan nsum tay lhăt gay n’hao tâm boh ma nău an ƀư geh nău tam ăp tâm nchră gưl têh, ăp nău tâm boh ơm geh, ntik n’hao geh nău tam ăp nău way tâm dâl n’hanh tâm boh đah bar ding./.