Kêng măng 19/10, ta Thủ đô Bắc Kinh, Kruanh dak Võ Văn Thưởng hŏ wơt kruanh rđău kan du đêt tập đoàn dâk bôk năp Trung Quốc. Ta rơh wơt Kruanh Tập đoàn Huawei Lương Hoa, Kruanh dak Võ Văn Thưởng lah rjăp, rnôk rgâl mbrô n’hanh hun hao wăng sa mbrô lam ntŭr neh hun hao dŭt ngăch. Việt Nam dŭt uănh khlay n’hanh rgum rgâl mbrô, rdâk njêng jâng wăng sa mbrô n’hanh nău rêh mbrô.

Việt Nam kuăl jă nău tâm boh bah ăp ding, bah ăp gưl Chính phủ an tât nuĭh kan êng bah dih, tâm boh, ntuh kơl tâm rdâk njêng ndơ dŏng mbrô, lôch jêh trong tĭng kan ntrŭt ntrôl hun hao wăng sa mbrô. Wơt wa Lý Tự Học - Kruanh HĐQT Tập đoàn Trung Hưng (ZTE), Kruanh dak Võ Văn Thưởng rnê âk nău dơi tăch rgâl bah ZTE n’hanh nău dơi geh ƀư njêng tăch rgâl bah ZTE ta Việt Nam, lah băl tâm boh tăch rgâl têh đah âk hãng viễn thông bah Việt Nam. Kruanh dak rnê âk nău ăp nuĭh ntuh kơl Trung Quốc hŏ an ƀư rlău puăn rbăn trong nchrăp kan hôm geh nău tam kan ta Việt Nam đah lĕ rngôch tơm prăk đăng ký rlău 26 rmen đôlar. Tâm nê, ZTE hŏ geh măt ta Việt Nam bah âk năm aơ. Kruanh dak nsing nơm, ZTE mbra geh nău tâm boh lhăt, geh nău tam lơn đah ăp doanh nghiệp ta Việt Nam tâm let năp tay; rgop tâm nău hun hao nsum bah tâm boh Việt Nam – Trung Quốc.