Kêng măng 24/10, Kruanh dak Võ Văn Thưởng lĕ wơt Thượng tướng Roberto Legrá Solongo Tổng Tham mưu trưởng, Groi kruanh N’gâng kan ăp Rmôt tahen cách mạng Cuba. Kruanh dak Võ Văn Thưởng lah rjăp, nuĭh ƀon lan 2 dak Việt Nam-Cuba tâm rnglăp mro, nkoch ăp nău jêr jŏt tâm ăp lvang cách mạng; uănh mĭn, ntrŭt nsôr ndrel rlet rlău ntŭl rlong.

Kruanh dak mĭn lah: Đảng, Ngih dak, nuĭh ƀon lan Việt Nam răm rhơn yor nău tâm rnglăp dŭt n’hâm n’hanh tâm boh kan ndrel Việt Nam-Cuba hun hao ngăn ngên ta âk ntil. Kruanh dak Võ Văn Thưởng dăn đă, ndrel đah n’hao lơn tay ăp rơh tâm nchră gưl prêh, 2 ding an ntrôl dăng ăp nău ƀư tâm nđŭr, kan ndrel đah N’gâng kan mât njrăng bri dak Việt Nam n’hanh N’gâng kan ăp rmôt tahen cách mạng Cuba. Tâm rnôk lam ntŭr neh hôm âk jêr jŏt, tâm boh kan ndrel mât njrăng bri dak đah 2 dak geh nkô̆ nău khlay, kan ndrel đah N’gâng kan ăp rmôt tahen cách mạng Cuba tâm ăp ntil nău 2 ding dơi n’hanh ŭch kan ndrel.