Ta Ngih dak si xă Tu Mơ Rông, nkuăl Tu Mơ Rông, n’gor Kon Tum, moh nuĭh ji geh nău mpeh săk soan tât ta aơ ŭch dơi nai dak si Hà but uănh. Yuh Y Hà rblang, 26 năm tĭng đah Ngih dak si xă Đăk Hà, jêh nĕ Ngih dak si xă Tu Mơ Rông, nkuăl Tu Mơ Rông gâp bên tĭng nuĭh ji, jêh nê̆ gâp lah nuĭh Xơ Đăng deh ta nkual neh aơ, nuĭh ƀon lĕ 2 xă lĕ rngôch lah kônh wa Xơ Đăng jêng wât nău ngơi, nău way tâm ngơi dơh lơn. Mĭn joi bah n’gâng kan ƀon lan, nuĭh ƀon lan n’hanh ăp nuĭh kan ngih dak si dơi gĭt, rgop têh ngăn bah Kruanh ngih dak si Y Hà rlău 26 năm pah kan lĕ dơi ndơ̆ ăp nuĭh mê̆ nuĭh Xơ Đăng tât deh ta ngih dak si ntlơi nău deh kon ta jay. Đah yuh Y Hà, răm têh ngăn dơi saơ nău mât uănh săk soan bah kônh wa Xơ Đăng nar lơ uĕh lơn.

Bah năp đaơ nu nău geh bah ji dŭt jêr jŏt, dŭt lah âk yơn tât aƀaơ trong kan mât uănh săk soan lĕ tât rnăk wâl, tât ƀon lan. Gâp gŭ ta aơ mô hôm kop srê kop duh, n’hŭch ji duh rtoh luh mham rih, ji rtoh luh ăp nău ji tâm ntưp. Tâm trong kan njrăng n’gang kop srê dơi hŭch âk n’hanh kloh na nê̆. Mpŏng lĕ rngôch kônh wa ta ntŭk uănh tât săk soan an săk nơm.

Tâm rnôk 26 năm tĭng, lĕ nuih n’hâm đah ngih dak si nkual jêr Tu Mơ Rông, đah nuĭh ji nuĭh Xơ Đăng, yuh Y Hà lĕ rlet rlău âk jêr jŏt gay tĭng trong hăn nti n’hanh jêng ntŭk nsing kơl kônh wa ntŭk nkual prêh gĭt tât nău mât uănh săk soan uĕh lơn. Nkre kan nkre nti, năm 2017 yuh jêh năm nti Cử nhân điều dưỡng sản phụ khoa. Đah nău ƀư Kruanh Ngih dak si xă Tu Mơ Rông, ndrel đah ƀĭt joet nău kan ta ngih dak si, yuh Y Hà hôm e ƀa ƀơ tât 8 thôn tâm xă gĭt nu nău kop ji, mâp nkoch trêng nuĭh ƀon lan uănh tât săk soan. Tâm rnôk pah kan yuh ndrel nai dak si, nuĭh kan bah ngih dak si lĕ âk rơh săm rêh bu nuĭh bŭn n’hanh oh bê. Nuih n’hâm lĕ đah ngih dak si nkual jêr jŏt n’hanh nuĭh ji nuĭh Xơ Đăng bah yuh Y Hà dơi nuĭh kan ndrel uănh lah prêh. Yuh Phan Thị Thanh Vân, nuĭh kan Ngih dak si xă Đăk Hà an gĭt:

Yuh Y Hà lah du hê ngăch prăl, dŭt n’hâm tâm nău kan. Ta ngih dak si ăp nar yuh ntĭm rđău nuĭh kan bah ngih dak ndrel ăp oh nô hăn thôn ƀon gay nkoch trêng đah mât uănh jêh deh jêh nĕ chuh dak si ta ntŭk bah dih ngih dak si. Yuh uănh tât ntop kơl oh nô tâm ngih dak si.

Hôm Nai dak si Nguyễn Thành Thảo, Groi Giám đốc Ngih dak si nkuăl Tu Mơ Rông ri uănh lah:

Đồng chí Y Hà dŭt n’hâm tâm trong kan mât uănh săk soan nuĭh ƀon lan ta ntŭk. Đah nuih n’hâm gơih nđơr đồng chí Y Hà dŭt uănh tât kônh wa ta ntŭk n’hanh Y Hà geh nău ŭch hao tâm nău kan nti nău way pah kan. Đồng chí Y Hà du hê hăn lor ntoh lư bah ntŭk kan.

Geh 26 năm tĭng, dŭt n’hâm đah nău kan mât uănh săk soan nuĭh ƀon lan, yuh Y Hà, Trạm trưởng Ngih dak si xă Tu Mơ Rông, nkuăl Tu Mơ Rông, n’gor Kon Tum lah ntŭk nsing nâp an kônh wa Xơ Đăng ntŭk aơ. Nău nsơr, nuih n’hâm lĕ đah nău kan n’hanh nău ŭch nău kan bah yuh dôl rgop rgâl nău wât, kơl nuĭh ƀon lan ta nkual neh hôm e âk jêr jŏt aơ dơi gĭt tât n’hanh mât uănh dak si uĕh lơn. Tă bah nĕ, he saơ nuih n’hâm, săk soan dŭt n’hâm n’hanh bah ăp cán bộ, nuĭh kan dak si ta nkual jru ngai. Nkre ƀư nuih n’hâm tâm rnglăp, nău du nuih n’hâm bah lĕ rmôt cán bộ dak si n’hanh đah nuĭh ƀon lan. He dơi saơ nău ntô̆ n’hao bah nuĭh Xơ Đăng ta ntŭk rnôk geh cán bộ ntoh lư kơt yuh Y Hà, rgop rgâl nău wât, pơk hvi nău gĭt ndoh ndơ dak si an ƀon lan.