Kruanh Quốc hội lĕ khâl Ngih măy têh ngăch ndeh điện Xiaomi n'hanh Tập đoàn Thị Nguyên (CVTE); hăn uănh ntŭk mpla nsơ ndơ geh ƀư, ngih măy nkret njêng ndeh điện ndrel ăp ndơ màn hình tâm rgop dŏng công nghệ AI tâm ăp trong kan bah CVTE.

Kruanh Quốc hội mpơl nău nkah gĭt n'hanh uănh lah prêh ăp nău dơi hun hao bah Xiaomi n'hanh CVTE; an gĭt, Việt Nam way ŭch rŏng ăp doanh nghiệp công nghệ dâk bôk năp tât mĭn joi trong ntuh kơl, pơk hvi kan ndrel, lơn lah tâm trong kan ndeh điện, pin, trong mât prăp ŭnh nar, bôk rngok mĭn njêng mhe, rgâl luh êng n'hanh hun hao trong pă an. Kruanh Quốc hội Trần Thanh Mẫn lah rjăp, Quốc hội Việt Nam way uănh khlay ƀư lôch jêh trong pháp luật, rgâl uĕh ntŭk ntuh kơl, tăch rgâl tĭng trong kloh rwah, đăp mpăn n'hanh dơh soih, đăp mpăn nău dơi tâm di bah nuĭh ntuh kơl; nchrăp djăt ăp nău dăn đă tâm di bah doanh nghiệp, tĭng ƀư lôch jêh tay trong pháp lý, nta trong dơh an doanh nghiệp dak bah dih ntuh kơl n'hanh pah kan jŏ jong, săk rnglăy ta Việt Nam, nsing ta nău tĭng jăp pháp luật n'hanh đăp mpăn tâm ban nău geh đah ăp ding.